Green Mizoram Day hman dan tur rel

Thawhṭanni leh nimin khan district hrang hrangah kumina Green Mizoram Day hman dan tur ngaihtuahin sorkar official-te an ṭhukhawm.

Champhaiah chuan nimin khan additional DC CC Lalchhuangkima hoin DC conference hall-ah hman dan tur an rêl a, Green Mizoram Day chu June 9-ah Champhai District Park an hawnna hun hman an rel. Day pual hian thing ṭiak 6,000 phun tum a ni a, phun turin sorkar department hrang hranga thawkte ngen an rel.

Siaha-ah pawh nimin khan DRDA project director VL Hruaizela Khiangte hoin Green Mizoram Day hman dan tur an rel a; a hawnna hun chu June 9-ah DC Complex-ah neih ni se, an ti.

Meeting-ah department hrang hrangte chu an department ram chhung-a phun tur thing ṭiak an mamawh zat MADC sorkara Forest department-ah inhriattir turin an ti a; thing phunna tur ram nei remchang lo department-te chu kawngpui sirah emaw, hmun remchang dangah emaw phun mai turin an ti a ni.

Serchhipah chuan Thawhṭanni khan DC Sangchhin Chinzah hoin a pisaah Green Mizoram Day hman dan tur an rel a; kum 2015-a sorkar department hrang hrangten chanpual an semna, Zawlpui kawng leh Eklavya School compound-a hma an laknate ûmzui turin ruahmanna siam ni se, an ti.