Reserve-a Forest hotu thing zaitir Dampa Group YMA-in ngaimawh

Environment, Forest and Climate Change (EFCC) department hotu hriatpuiin Dampa Tiger Reserve chhungah thing zaitir nia hriain, Dampa Group YMA hruaituten an enfiah a, thingzai ṭhahnem tak an hmu.

Dampa Group YMA president Ram­thanga'n Vanglaini palai a hrilh danin, Dampa Tiger Reserve chhunga thing zaina hmunte chu June 5, Thawhṭanni khan Group YMA hruaitute'n a hmunah an enfiah a, Teirei Forest khua, (Hruaitluang khua)-a Interpretation building chhungah thingzai Ngiaupui ft. 12 a sei char char 112, cubic thing phek 30, char char ft. 9-a sei 20 leh chartin 15 vel an hmu a, hmun dangah ft. 12 leh ft. 8 vela sei inchi 5 bial thingzai panga, chartin leh charchar 10 vel an hmu bawk.

Dampa Group YMA hruai-tute chuan heng thingzaite hi Dampa Tiger Reserve chhunga mi, Dampa Field Director VL Fala hriatpuia zai niin an sawi. Dampa Group YMA hruai-tute chuan thil awmdan hi Central YMA-ah an thlen tawh a; Central YMA thurawn angin kimchang zawka ziakin thlen leh thuai an tum.

Dampa Group YMA Presi-dent chuan, thing leh mau leh nungchate humhalhtu turin a tichereu zawnga thil an ti nia an hriat avangin an hriatthiam theih loh thu a sawi a, Department lamah pawh Chief Wildlife Warden hnenah ziakin an thlen tawh a, mawhphurtute hrem ngei turin an phut nghe nghe a ni.

Central YMA hruaitute chuan, Dampa group hruaitute hnen aṭangin a thuphungin he thu hi an hriat tawh thu leh, thu chipchiar zawk an hriat hunah a ṭul angin CYMA-in a bawhzui tur thu an sawi bawk.

EFCC department hotute pawhin Dampa Tiger Reserve chhungah thing zai a awm ngei tih an hriat tawh thu leh, an chhui chian thuai tur thu an sawi. Thu dawn danin, EFCC department hian thing zai a nih dan enfiah turin an department-a officer pakhat an ruat a, a hmunah a enfiah mek a ni.