AR-in Healthy Mizoram Campaign nei dawn

Assam Rifles chuan June 21, 2017 khian Lammualah Healthy Mizoram Campaign an huaihawt dawn a, a duh apiang tel turin Mizo mipui an sawm.

Healthy Mizoram Campaign an buatsaih tur chungchangah hian Assam Rifles 23 Sector DIG Brig. MS Mokha chuan nimin khan Loch Hall-ah thuthar thehdarhtute a kâwm a; campaign chu Governor Lt.Gen. Nirbhay Sharma hmathlir anga neih a nih tur thu sawiin, "Governor-in Healthy Mizoram Cam­paign kalpui a duh a, Mizo mipui an hrisel zawk theih nan leh nun hrisel an neih theih nan physical fitness kalpui ṭha a ti a ni," a ti.

DIG Brig. MS Mokha chuan, Healthy Mizoram Campaign programme pui ber chu June 21-ah neih tur a nih rualin, June 3 aṭang khan campaign ṭan a nih thu a sawi a, "June 3 aṭangin training of trainers ṭan a ni a, June 17 thleng neih a ni ang," a ti a; trainers training-ah chuan pawl (NGO) hrang hrang aṭangin mi 100 vel an tel thu leh, Rashtrapati Bhavan-a Neurotherapy Health con­sultant Acharya Ram Gopal Dixit-a'n trai­ning a pek thu a sawi.

Healthy Mizoram Cam­paign chu International Day of Yoga-ah kher huaihawt an tum chhan zawhna a chhànnaah Brig. Mokha chuan, Yoga chuan sakhua leh hnam a tliar loh thu leh taksa insawizawina chi khat a nih thu a sawi a, "Healthy lifestyle campaign a ni a, Yoga nen inkungkaihna a nei lo. Ni dangah pawh kan la ti zel dawn," a ti.

Zawhna dang a chhan­naah Brig. MS Mokha chuan, Health Mizoram Campaign an buatsaih tur chu physical exercise a nih thu a sawi rualin, Yoga chu item pakhat a nih thu a sawi a, "Hriselna atan kawng hrang hrangin exercise tih a ni dawn a, a duh apiangin an rawn zawm thei ang," tiin, a duh apiang tel turin mipui a sáwm a ni.

Healthy Mizoram Cam­paign hi June 21 khian Lammualah neih a ni dawn a, zing dar 6-ah ṭan a ni ang. Brig. MS Mokha chuan, campaign an huaihawt turah hian YMA, MZP, MSU leh pawl dangte an thawhpui dawn niin a sawi a; nimina press meet a neihah pawh hian Central YMA hruaitu leh kohhran pawl pakhat hruaitute an tel a ni.