Mizo tlangval pahnih tualthihna ngaihvenin Joint NGO hruaitute Guwahati-ah an kal
May 28, 2017 zana Guwahati-a Mizo zirlai pahnih - C Lalhmangaihsanga leh R Lalmalsawma, Lunglei Electric Veng ve ve tualthih chungchang bawhzui turin nimin khan Joint NGO hruaitute Guwahati an thleng.
Central YMA president Lalbiakzuala hnen aṭanga thu dawn danin, Joint NGO hruaitute hian tualthattu chhui chhuah a ni ngei theihna atan te, dan anga hrem a nih ngei theihna tur leh thil thleng hi Mizo mipuite'n an ngaihven a ni tih Assam sorkar hotute'n an hriat theih nan Guwahati-ah hian an kal a ni.
Joint NGO hruaitute hian nizan khan Mizoram House-ah Guwahati Mizo Welfare Association leh Guwahati Mizo Students Union hruaitute an kâwm.
Ruahman lâwk ang chuan, Joint NGO hruaitute hian vawiin hian Mizo tlangval pahnihte kalna Assam Downtown University tlawhin, zirlaite nen an inkâwm ang a; zirlai pahnihte ruang hmuhna hmun an tlawh bawk ang. June 9-ah Assam chief minister Sarbananda Sonowal leh tualthihna chhui tura din investigation team-a an hotu, Ajay Tiwari an kawm dawn a ni.
Guwahati-ah hian Joint NGO aiawhin CYMA president Lalbiakzuala leh general secretary Lalhmachhuana, MZP president Lalsangzuala Ngente, MSU president RB Lalmalsawma leh treasurer T Nengkhansut-te bakah, North East Students Organisation finance secretary Ricky Lalbiakmawia te an kal a ni.