Kolasib-ah kawngpui dan chhunzawm a ni

Kolasib Joint Action Committee (JAC) bultumin Kolasib District Hospital-a doctor (surgeon) pakhat, thlâktu awm loa sawn duh lohna lantirna atan leh transfer order sût phutna atana June 6, Thawhlehni zing aṭanga NH-54 kawngpui an dan ṭan chu nimin khan chhunzawm a ni a; sorkar aṭanga thu lawmawm an hmuh hma chu dan an tum.

Kolasib aṭanga thu dawn danin, kawngpui dang hian Thawhlehni zing aṭan khan Kolasib veng hmawr pahnih, Khuangpuilam leh Rengtekawnah mi eng emaw zat an duty a; Thawhlehni zan dar 11 vel aṭang khan Khuangpuilam leh Rengtekawna kawng dan chu tihtawp niin, khualzin tangkhangte'n ei leh in tur an hmuh theih nan kawngpui chu Diakkawnah chauh dan a ni tawh.

Bialtu MLA PC Zoram Sang­liana chuan nimin khan Kolasib a tlawh a, JAC hruaitute chu an kawng dan titawp a, an thil phût bawhzui hna chu a kuta dah tawh turin a ngen. JAC hruaitute erawh chuan, bialtu MLA ngenna chu an rin zawh tawh loh thuin an chháng thung.

Kawngpui dan a nih avang hian Kolasib-a police awm sa bakah, hmun dang aṭangin police eng emaw tirh luh belh a ni a, mahse, kawng dangtute hnawhkian an tum lo. Kawng dannaa mipui duty-te chuan thu lawmawm hmu lo chuan an thu sût lo turin JAC hruaitute an ngen a ni.

Nimin tlai thleng khan lirthei tangkhang 350 vel a awm a, Silchar lama buaina a awm avangin Assam lam aṭang chuan lirthei kal a awm meuh lo.

Kawng dan a nih bakah hian pisa leh zirna-in zawng zawng khar a ni a, bank bik chu vawiin aṭangin hawn phal a ni.