Hnathawh endiktute an ṭhukhawm

Mizorama development project, scheme leh programme hrang hrang, cheng vbc. 50 chung lam sennate chak zawk leh a hun taka zawh a nih theihna tura endika viltu tur, High Level Monitoring and Surveillance Committee-I (HLMSC-I) chu Thawhlehni khan chief minister Lal Thanhawla hoin CMO conference room-ah an ṭhukhawm.

Chief Minister chuan, tun hnaia New Delhi-a NEC Plenary Meeting neihah Mizoram chu thil dangah ti ṭha mah se, project implementation lamah ṭan lakna tur a la nei tam tih sawi lan a nih thu a sawi a, "NEC leh NLCPR hnuaia project-te nakin zelah Mizoram tan phurrit a nih loh nan leh a hun taka zawh a nih theih nan theihtawpa ṭan lak a pawimawh," a ti.

Meeting-ah hian project leh scheme-te thawh dan leh a hun taka zawh a nih theihna tura hmalak dan te, project uluk taka a bul-ṭhut aṭanga ruahmanna ṭha ṭawk lo a awm ṭhin vanga a hun taka zawh hman loh awm ṭhin te, sum ruahman dan fel tawk lo laite leh state matching share pek danah ruahmanna fel zawk neih dan turte an sawiho a ni.