Zirtirtu indaih loh chungchang MSU-in Himpuia an sawipui

Mizo Students Union (MSU) chuan thuchhuah siamin, June 5, 2017 khan an hruaitute'n parliamentary secretary (School Education) Joseph Lalhimpuia an hmu a, zirtirtu indaih loh chungchang an sawipui tih an tarlang.

MSU chuan, thing-tlang sikul tam takah zirtirtu indaih lohna a nasat em em laiin, Aizawl leh a chhehvel sikulah zirtirtu an tam lutuk niin an sawi a, "MSU-in a zir chianna aṭangin sikul ṭhenkhatah zirlai nei mang loah zirtirtu an awm del dul a, sikul ṭhenkhatah chuan zirtirtu 10 chuangte an awm a, an âwlthâwng hle a ni," an ti.

Thingtlang lama sikul-ah erawh chuan zirtirtu pahnih/khat lekte an awm tih sawiin, "Thingtlanga zirtirtute leh khawpui lama zirtirtute hian zirlai naupangte zirtirna an pekna kawngah an inhah hleih hle a ni," an ti a; pupil teacher ratio (PTR) ringawt beh-chhan lo a, class awm zat mila zirtirtu an awm ngei theihna tura hma la tur leh Aizawl leh a chhehvela zirtirtu indaih taka awmte chu thingtlang lama dah ṭhen turin Parliamentary Secretary an ngen a ni.

MSU hruaitute chuan, tun thlenga Mizoram University-in vice chancellor nghet a la nei lo chu pawi an tih thu sawiin, vice chancellor nghet an neih thuai theih nana hma la turin an ngen bawk.