CSS hnuaia hmalaknate thlirho

Champhai District Development Coordination & Monitoring Committee chu nimin khan chairman CL Ruala, Lok Sabha MP leh cochairman Ronald Sapa Tlau, Rajya Sabha MP hoin an ṭhukhawm a; CSS hnuaia sorkar hmalakna hrang hrangte an thlirho.

CL Ruala chuan, department hrang hrangin hmasawnna hnathawh an neih hrang hrangte chu fakawm a tih thu a sawi a, "Tun aia chak zawk leh ṭha zawka mahni chanpual ṭheuh hlen tum a pawimawh. Champhai district-in hma a sawn zel theih nan theihtawp chhuah a ngai," a ti.

Hna thawhnaah a hlêp chauh ngahtuah loa Mizoram hmasawnna hna kalpui leh thawh zawhte chu belhchian dâwl a ni tur a nih thu sawiin Lok Sabha MP chuan, sorkar laipui aṭanga sum hmuh te chu a nihna tur dik taka hmang turin Committee member-te a chah.

Ronald Sapa Tlau pawhin thu sawiin, MP fund, MLA fund leh sor-kar fund hrang hrangte chu Mizoramin hma a lo sawn pui theih nan dik taka hmang ṭhin turin kalkhawmte a chah a, "Department hrang hrang, V/C leh NGO-te ṭha taka thawhho a pawimawh," a ti.

Meeting-a tarlan dan-in, Champhai district-ah hian MGNREGA hnuaiah kum 2015-16 chhungin job card nei mi 28,091-te ni 73 inhlawhna siamsak a ni a, kum 2016-17 chhungin job card nei mi 28,231 tan ni 37 inhlawhna siamsak a ni.

UDPA hnuaia Pradhan Mantri Awas Yojana hnuaia in sak ṭanpuina diltu mi 3,106 zinga mi 2,125-te dilna pawm a ni a, dilna pawm lohte chu chhan hrang hrang vang a ni.