Turan-a'n Turkey jersey a hlip

Turkey captain Arda Turan chuan Thawhlehni khan international football a chawlhsan thu a puang ta.

Kum 30-a upa Turan hi an ram squad-ah telh a ni. Thawhṭanni zan khan Macedonia nen friendly match an khel a, hemi hnuah thuthar thehdarhtu pakhat Bilal Mese nen an intibuai.

Thawhlehni khan Barcelona mid­fielder hi an ram squad aṭanga paih a ni a, he mi hnu darkar rei lote hnuah ram tana inkhelh a tum tawh loh thu a sawi zui ta a ni.

Turan chuan, "National team tana ka hun chu a liam ta niin ka hria," a ti. Turkey tana match 96 a khelh aṭanga goal 17 khungtu hian an ram a hmangaih thu a sawi lang tel bawk.

Khawtlang media ten an sawi dan chuan, Turkish newspaper Milliyet-in kum 2016 Euro an khelh dan an tarlan dan chungchangah Turan hi a lungawi lo hle. Sports journalist Mese a hmuh leh takah chuan va panin ṭangkam mawi lo taka a an khum bakah a ṭhianten an ṭhelh ngai kawpin a che mawi lo a ni.

Association of Sports Journalists of Turkey chuan he thil thleng hi an dem thu thu an tarlang ve nghal a, Mese hian thu neitute hnenah a lungawi lohna thu hi thlen a tum bawk.