Wozniacki barakaihtu Ostapenko

French Open hmeichhe singles-ah beisei loh result kan hmuh chhunzawm zel. Seeded pawh ni phak lo Jelena Ostapenko chuan world number 1 hlui Caroline Wozniacki a hneh! Inkhel dangah Timea Bacsinszky chuan Kristina Mladenovic a hneh ve bawk.

Thawhlehni zan khan Paris-ah ruah a sur nasat avangin quarterfinal inkhel a khaihlak deuh a, darkar thum chuang an chawlh hnuah khelh chhunzawm niin kum 19-a upa Ostapenko hian Wozniacki lakah 4-6, 6-2, 6-2 in hnehna a chang.

Latvian nula zingah Ostapen­ko hi Open Era china French Open semifinal lut leh thei hmasa ber a ni a, kum 2007 hnu lamah clay court inelna liana kum 20 hnuai lam semifinal lut leh thei hmasa ber a ni bawk.

World number 47 Ostapenko chuan, "Rin thiam a har, ruah sur vanga court chhuahsan a ngaih hnua inkhelh leh hi a harsa hle. Caroline hi khingpui khirh tak a ni ziah a, na taka ka nawr thei kha ka vanneih phah," a ti. Caroline nen vawi li an intawn tawhah Os­tapen­ko hian hnehna a la chang vek.

Philippe Chatrier Court-a inkhel dangah Bacsinszky chuan tun hnai kum thum chhunga semifinal a vawi hnih luhna ni turin darkar khat leh minute 49 chhungin Mladenovic chu 6-4, 6-4 in a hneh. Champion lai Garbine Muguruza hnehtu Mladenovic lakah fans lamin beiseina nei sang viau mah se an duhthusam a thleng dik thei dawn ta lo. Kum 17 chhung zet chu Roland Garros-ah hian French nula an champion thei tawh lo.

Swiss tennis player Bac­sinszky chuan, "He hmunah hian ka inlan tirh aṭangin nuam ka ti hle. Mahse, vawiin zet kha chu ruah a tamin ṭum hnih kan chawlh a ngai a, boruak a danglamin a harsa tawh hle. Semifinal kan khelh tur hi ni hlimawm leh dangdai a ni dawn, a tawpa hlim zui zawk ka nih theih nan theih­tawp ka chhuah ang," a ti.

Vawiin tlai hian semifinal khelh zui tur a ni a, Bacsinszky hi a kum 28 tlin cham a nih dawn bakah a khingpui tur Ostapenko-i hi a kum 20 tlin champha a ni chiah bawk ang - semifinal danglai leh hlimawm tak a ni ngei dawn.