Hlâwk zawka grape thar theih nan Sorkarin a chíngtute ṭanpuina a pe

Mizoram sorkar chuan grape wine siam leh zawrh a khap mek laiin, khawchhak tlangdunga grape chíngtute'n hlâwk zawka grape an thar theihna atan tun hnai khan mi ṭhenkhat hnenah ṭanpuina a pe.

Vanglaini thu dawn danin, tun hnai khan Mizoram sorkar chuan Fostering Climate Resilient Upland Farming System (FOCUS) hnuaiah khawchhak tlangdunga grape chíng thar mi ṭhenkhat chu ṭanpuina a pe a ni. Hei bakah hian, grape chíngtu páwlte chu grape chíng thar ṭanpuina dawng tlâka an ngaihte hming thehlut tura tih leh an ni a, FOCUS hnuaiah ṭanpuina pek leh tur an ni.

Hetih lai hian, Champhai Grape Growers Society (CGGS) leh Hnahlan Grape Growers & Processing Cooperative Society (HGGPCS) chuan an winery-ah grape an her ṭan leh tawh.

CGGS hian July 13, 2022 aṭangin kut hnathawktute hnen aṭangin grape an lei ṭan a, cheng nuai 10 chuang man an lei tawh. Grape an lei khawmte chu July 20, 2022 aṭang khan an her ṭan a, an her ṭanna hun hi sorkar official-te pawhin an telpui a ni. Grape dah khawl sa an la ngah avangin wine-a chang tawhte chu úm (bottle)-ah an thun nghal zel ṭhin.

HGGPCS pawhin grape an lei khawlte chu an her ṭan tawh a, tunah hian wine-a siam turin eng emaw zat an um mek. Tun dinhmunah chuan wine siam sa, úma thun tur an nei rih lo. HGGPCS hian kut hnathawktute aṭangin grape quintal 800 chuang an lei tawh a, kg. khat Rs 60-in an lei a ni.

Hetih lai hian, Excise & Narcotics department (END) chuan RTI Act hmanga zawhna an chhannaah, "Mizoramah wine siam turin hriatthiamna tu hnenah mah sorkarin a pe rih lo. Dan kalha che hriat an nih chuan dan ding lai tlawhchhanin mansak an ni ang," tiin an lo chháng tawh.

Champhai leh Hnahlana grape wine siamte chu MLP Act, 2019-in a khap zingah a tel leh tel loh RTI Act hmanga zawhna pawh END SPIO chuan, "Champhai leh Hnahlana grape wine an siam chhuahte hi The Mizoram Liquor (Prohibition) Act, 2019-in a phal loh (a khap) zinga mi a ni," tiin an chháng tawh bawk.