KMMTTP siamnaa ngaw tihchhiat Thubuai NGT-in a ngaihtuah ṭan

Kaladan Multi Modal Transit Transport Pro­ject (KMMTTP) kawng­pui sialnaa ramngaw leh nungchate hum­halhna kaihhnawih dan (environmental law) bawhchhiatna chungchanga National Green Tribunal (NGT)-a zualkona chu NGT, Eastern Zone Bench, Kolkata chuan July 25, 2022 aṭang khan a ngaihtuah ṭan a, Mizoram sorkar leh sorkar laipuiah tih turte a hriattir.

KMMTTP kawng siamnaah environmental law bawhchhiat a awm nia ngaiin Center for Environment Protection (CEP), Aizawl chuan NGT-ah thu thlenin hma la turin a ngen a; NGT chuan ngaihtuah zui tlakah ngaiin a ngaihtuah ṭan ta a ni.

Thu dawn danin, KMMTTP kawng laihah ramngaw zau tak paltlang a ngaih vangin forest clearance neih a ngai a, forest clearance chu sorkar laipuia Ministry of Environment, Forest & Climate Change (MoEFCC) chuan June 10, 2011 khan a thuphungin Mizoram PWD hnenah a pe a ni.

Kawng laihin envi­ronment a nghawng chhiat tur zángnadawmna, environmental compen­sation (CA) leh net present value (NPV) pek tur zat chu Mizoram sorkara Environment, Forest & Climate Change (EFCC) department-in a chhût chhuak ang a, zangnadawmna chu Mizoram PWD-in EFCC department-ah an pe tur a ni. KMMTTP siamna atan hian ramngaw hectare 196.75-a zau tihchhiat a ni dawn niin an sawi.

EFCC department chuan NPV leh CA chu chhût chhuakin, PWD-ah a hriattir tawh a, mahse, kum 10 liam hnuah pawh PWD chuan zangnadawmna a la pe lo. Kawng laihin ramngaw a tihchhiat aia ramngaw dang (compensatory afforestation atan) siam lehna turin Bungbomual ruahman a ni a, mahse, hmalakna a awm zui lo.

KMMTTP kawngpui laihnaa ramngaw tihchhiat chungchang leh a kaihhnawih thilte chu CEP chuan Mizoram PWD leh sorkar laipuia Ministry of Road Transport and Highways (MoRTH)-ah November 29, 2019 khan a thlen a; PWD-in hma an lak zui loh avangin CEP chu NGT-ah an zualko ta a ni.

CEP chuan NGT-a an zualkonaah hian, KMMTTP kawng sialnaah Forest Conservation Act, 1980, Environment (Protection) Act, 1986, Biological Diversity Act, 2002, Water (Prevention and Control of Pollution) Act, 1974 leh dan dangte bawhchhiat a nih bakah, National Board for Wildlife aṭanga phalna nei loin Ngengpui Wildlife Sanctuary hrûla eco sensitize zone huam chhungah kawngpui laih a nih thute a tarlang.