Dr BD Chakma'n danin bàn a phût chuan bàn a inhuam

Eirûk thubuaia kum khat táng tura Court-in a chungthu a rel Dr BD Chakma, Tuichawng bialtu MLA leh BJP Mizoram Pradesh vice president chuan, Court thutlukna chu Gauhati High Court, Aizawl Bench-ah khin lêt an tum thu a sawi a; dan ang a nih chuan MLA aṭanga bàn a inhuam thu a sawi bawk.

Dr Buddha Dhan Chakma hian nimin khan BJP pisaah thuthar thehdarhtute kâwmin, Chakma Autonomous District Council (CADC)-a chief executive member (CEM) a nih laiin hruaitu dangte nen inhriatthiam tawnnain executive secretary Digambar Chakma hnen aṭangin CADC-a thawkte hlawh leh hamṭhatna dang phuhrûk nan development fund an hman pûk thu a sawi a, "Kan mimal hamṭhat nana hmang pûk kan ni lo," a ti a; CEM leh MDC an nih loh hnuah pawh sum hman pûk a awm ṭhin thu a sawi.

Sum an hman pûk chu an hlawh aṭanga rulh ṭhin a nih thu sawiin BD Chakma chuan, "Executive Secretary-te'n account an enkawl mumal lo ṭhin a, a cháng chuan kan hlawh aṭanga rûl turin kan hrilh nawn fo," a ti.
Dr BD Chakma chuan, sum chu an rûl zo tawh emaw an intih laiin, July 11, 2017 khan Mizoram sorkara District Council & Minority Affairs Secretary hnen aṭangin an la rûl zo lo tih thu an dawn chauh thu te, a hnu rei lo têah an rulh nghal vek thu leh, October 19, 2017-ah Liabilities Clearance Certificate an dawn thute a sawi a ni.

An hun laia Executive Secretary-in development fund zinga 5% chauh pûk a ni tih a sawi laia development fund hman ṭhen vanga hmasawnna hnathawh buai anga sawi a ni chu mak a tih thu sawiin BD Chakma chuan, "Special Court (PC Act) thutlukna hi Gauhati High Court, Aizawl Bench-ah khin lêt kan tum," a ti a, an pawisa pûk an rul zo tawh chunga thubuai kalpui a ni chu politics a an hmel tih balh tumna nia a hriat thu a sawi.
MLA Dr BD Chakma chuan, dan anga MLA aṭanga bàn theih a nih chuan bàn a inhuam thu sawiin, "Kum 2017-ah minister aṭangin awlsam takin ka báng tawh a, tunah pawh dan ang a nih chuan MLA aṭangin bàn ka ngam a, harsatna a awm lo," a ti bawk.