Sum enkawlah Mizoram sorkar a hlawhchham chiang hle - Duhoma

ZPM leader Lalduh­oma chuan, Mizoram sorkar chu sum enkawlah a hlawhchham chiang hle tih sawiin, zahthlâk a tih thu a sawi.

Lalduhoma hian nimin khan Khawzawl Veng­thar leh Chawngtlai Venglaia vantlang inkhawm­ah thu a sawi a; "Kan ram sum leh pai dinhmun kan thlirin, sum enkawl chungchangah kan sorkar hrawn mek hi a hlawhchham chiang hle. He thil lo thlen chhan lian ber chu hlemhlêtna a ni," a ti.

Mizoram sorkar sum dinhmun a ṭhat loh avangin sum chevel enkawl­tu treasury-in pawisa an pe chhuak tawh lo a ni tih chanchin tharah puan a nih thu sawiin Lalduhoma chuan, "Tunah hian treasury khâr hial a ngai lek lek tawh tihna a ni ber a, a zahthlak hle," a ti a; Pathian ringtu nihna ang pawhin thil zahthlak a nih thu a sawi.

ZPM Leader chuan, CSS sum Mizoram sorkarin a changtu tur department hnena pe chhuak duh loin thil dangah a hmansak ṭhin tih sawiin, "Kan ram sum leh pai enkawl tur hian kan Chief Minister hi mipui hian kan ring ngam tawh lo. MNF hi páwl ropui tak, ram leh hnam tana thisen pawh hlan ngam an ni a, amaherawhchu, an hotu lú ber avang hian tunah chuan an tluchhe mek a ni. MNF-ah ram leh hnam hmangaihtu tam tak an awm a, an hruaitu berin a zir loh avangin mi beidawng tam tak an awm tawh a ni," a ti.

Lalduhoma chuan, Mizote chu hnam taima leh thuawih an ni a, sor­karin chíng tura a tih chu an chíng zel tih sawiin, "A market a ngaih­sak leh si loh avangin kut hnathawktute kan bei­dawng leh ṭhin. Kan ram hi taima apiang an beidawn­na ram, thar tam apiangin tih ṭawih tur an ngahna ramah kan siam ta a ni," a ti a; ZPM-in Mizoram tluchhe mek siamṭhat theih ngei an inrin thu a sawi bawk.