KHAWTHLIR

Thisen pe
Fire and Emergency Services chuan an department kum 50 tlin lawm nan nimin khan FES directorate-ah thisen pek an huaihawt a, Civil Hospital, Aizawl tan thisen unit 30 an pe a, petute mipa 29 leh hmeichhia pakhat an ni. Lungleng-I Branch YMA pawhin an platinum jubilee pualin nimin khan Civil Hospital Aizawl tan thisen unit 29 an pe a, petute mipa 27 leh hmeichhia pahnih an ni.

Vaimim sawiho
Nimin khan Agriculture minister C Lalrinsanga hoin district agriculture officer leh block agricultural officer-te'n video conferencing kaltlangin SEDP kaltlanga vaimim sawngbawlna (post harvesting management) atana pawimawh a tihrona (drying process) chungchang an sawiho. Vaimim tihrona atan hian poly house siamin, UV film hmanga tihrona siam tum a nih thu sawi lan a ni.

Zirlai chawimawi
MZP Sub-Headquarters, Haulawng chuan nimin khan an khuaa Hausiampa Hall-ah kum 2022-a HSLC leh a chung lam first division-a pass tharte chawimawina an buatsaih a, Assembly deputy speaker Lalrinawma'n a hman­pui. Lalrinawma chuan, zirlaite'n an zirlaiah rilru an pek a, theihtawp an chhuah a pawimawh thu a sawi. Haulawng MZP hian HSLC-ah mi 11, HSSLC-ah mi pasarih leh BA-ah mi pakua hnenah chawimawina an hlan a ni.

Minister-in tlawh
AH & Vety minister Dr K Beichhua chuan nimin khan Zoram Poultry Development Society (ZPDS) hmunpui, Tanhril leh Ramrikawna an department ran chaw siamna hmun a tlawh. Dr K Beichhua chuan, ar vulhtute tana ár note man tláwm leh ṭha Mizoramah thar a, intodelh ngei tum a nih thu sawiin, "Mizoramin kár khatah ar notê 60,000 a mamawh. Ar awp keuna kan neih ṭhat ber ZPDS hian kar khatah ar 20,000 an awp keu thei a, chuvangin, kar khata ar nuai khat awp keu thei turin ZPDS hi thuam ṭhat tum mek a ni," a ti.