Kawlphetha Kutpui hman a ni

Kolasib DC Office, Power & Electricity department leh NEEPCO huaihawtin nimin khan Kolasib-a Parish Hall-ah Kawlphetha Kutpui (Ujjwal Bharat, Ujjwal Bhavishya, Power @ 2047) hman a ni a, minister of state K Lalrinliana'n a hmanpui.

Ujjwal Bharat, Ujjwal Bhavishya, Power @ 2047 hmanna inkhawm hi bawrhsap John LT Sanga'n a kaihruai a, sorkar department hrang hrang hotute leh pawl hruaitute an tel. Universal Household Electrification, Village Electrification, Distribution System Strengthening Scheme leh Capacity Addition chungchangte inhrilhfiah a ni.

K Lalrinliana chuan, kawlphetha hnianghnâr zawka hman tur siamnaah India ramah hmasawnna tam tak a awm rualin Mizoram pawhin hmasawnna a nei ve zel tih a sawi a, "Kolasib district chhunga Serlui-B Hydel Project leh Tuirial Hydel Project aṭanga siam kawlphethate ṭangkai taka hman mek a ni," a ti.

Minister chuan, Kolasib district-ah sorkar hnuaia Saubhaghya scheme kaltlangin a thlàwna mahni ina kawlphetha thlunsak chhungkua 1,839 an awm thu te, Pangbalkawn leh Chhimluangah ni zung chakna hmangin tui lâk (solar water pump) a nih thute a sawi bawk.

PE department executive engineer Lalzarliana chuan, Mizoram hmun ṭhenkhatah electric man pek lâwkna tur, pre-paid meter vuah hna kalpui mek a nih thu leh Kolasib-ah pawh kalpui thuai beisei a nih thu a sawi.

Lungleiah pawh nimin vek khan hman a ni a, khuallian Lunglei HPC vice chairman Lawmawma Tochhawng, MLA chuan khawvel hmasawnna kal zelah power mamawhna a sang tawlh tawlh tih sawiin, "Siam chhuah chauh ni lo, a semdarh kawngah leh miharsa zawk ban phaka chhawpchhuah a nih theih nan India sorkar chuan theih tawp a chhuah a ni," a ti.

PHE EE Zothansanga tarlan danin, Lunglei district chhungah Saubhagya, DDUGJY leh IPDS scheme hmangin connection thar 5935 pek, khaw 131 ah eng pek, DT buntawh 77, 11KV Line thlunzawm tawh 77.67 km, LT Line thlunzawm tawh km 69.44 km, ban tui ek thlak 39 leh Tlabung Control Room chungah 12 kwp bun hna thawh a ni.