Switzerland of the East min tiamtute'n Sri Lanka of the East-ah min hruai lut - Congress party

Mizoram Pradesh Congress Committee (MPCC) chuan, Mizoram chu leiba thangah a táng mek a, Sri Lanka dinhmun aia Mizoram dinhmun a ṭhat bikna tur a awm tawh rih lo a, Switzerland of the East tiamtute'n Mizoram chu Sri Lanka of the East-ah a hruai lut ta zawk niin an tarlang.

MPCC thuchhuah chuan, chief minister Zoramthanga’n Finance department a enkawl hnuah Mizoram sum leh pai dinhmun a chhe chak hle tih a tarlang a, "Kan leiba rulhna tura hmun dang aṭanga pûk hial a ngai ta a, leiba thangah kan táng chho mek. Sri Lanka dinhmun aia kan dinhmun a ṭhat bikna tur a awm lo. Switzerland of the East-a siam min tiamtute'n Sri Lanka of the East min thlenpui ta zawk. Mizoram mipui tawrhna a nasa hle dawn a, kan thinrim dawn nge, kan la nui hluah hluah zel dawn?" an ti.

Congress sorkar laiin Finance minister Lalsawta'n Mizoram sum dinhmun a siamṭhat avangin kum 2018-a MNF an sorkar hlimah Mizoram sum leh pai dinhmun a ṭha a, leibá a tlêm a, bill pek theih loh a awm lo tih sawiin, hna thawhna tur sum tam tak Congress sorkarin a hnutchhiah niin an sawi.

MPCC chuan, MNF sorkar chu a tlaran zawng hlira an chêt avangin sum dinhmun a hniam zel ta tih sawiin, "Chief Minister-in sum tamzia sawi reng chunga a duhsak zawngte vûr nana mipui sum a hman hiau hiau avangin tun hnaia CSS sum pek chhuah hnu aṭang khan Treasury-ah bill pass theih a ni tawh lo a, Mizoram sum leh pai chu ICU-ah a awm ta a ni," an ti.

Mizoramin sum leh paia harsatna nasa tak a tawh mek chu Finance Minister (Chief Minister) berin a la hre lo nia a lan thu sawiin MPCC chuan, "Siamṭhat tuma a chêtna emaw, kan dinhmun dik tak sawifiahna emaw a la nei miah lo," tiin an tarlang.

Congress party chuan, Mizoram sorkarin sorkar hnathawkte hlawh a pûk thu te, sorkar hnathawkte'n a hun takah hlawh an lâk theih loh thu te, GPF hrên a nih thu te, contractor bill tam tak a tan thu te, health care bill tam tak a tan thute an sawi a, "Hetiang hi thil awm dan a nih laiin, Pu Zoramthanga laináte leh a thurualpui contractor-te chuan harsatna an tâwk miah lo thung," an ti.

MPCC chuan, "Congress party hnapui ber tur pakhat chu MNF sorkarna hnuaia sum leh pai dinhmun chhe lutuk siamṭhat a ni a, Pu Lalsawta hoin theihtawp kan chhuah dawn a ni," an ti bawk.