Hripui vanga thi mi pakhat a awm belh

July 26, Thawhlehni khan Mizoramah swab sample 806 endik aṭangin Covid-19 vei mi 169 hmuh chhuah a ni a, July thla chhungin hripui vei mi 2,974 hmuh a ni tawh. Nimin khan hripui vei dam tawh mi 160 chhuahtir an ni a, Covid-19 vangin mi pakhat a thi.

Thawhlehnia Covid-19 positive hmuh thar mi 169-te chu mipa 69 leh hmeichhia 100 an ni a, rapid antigen test hmanga hmuh vek an ni. Positivity rate 20.97% a ni a, Mizoramah a záwnin ni 11 chhung Covid positivity rate 20% chung lam a ni tawh.

Hripui vei enkawl lai Chhiatangi (70), Vawmbûk, Lawngtlai district chu nimin tlai dar 4:15 khan State Referral Hospital-ah a thi. Chhiatangi hi Covid-19 positive a ni tih February 27, 2022 khan hmuh chhuah a ni a, nimin khan SRH-ah dah luh ni mah se, nimin vêk khan a thi a; natna dang nei tel a ni.

Nimin khan Covid-19 vei inenkawl zinga mi 160 chhuahtir an ni a; district tina chhuak zat chu - Aizawlah mi 84, Mamitah 23, Lungleiah 22, Saitualah 13, Serchhipah paruk, Kolasib-ah pali, Lawngtlaiah pathum, Siaha leh Hnahthialah pahnih ve ve leh Champhaiah pakhat an ni.

IDSP record angin, Mizoramah Covid-19 vei 2,32,080 hmuh chhuah a ni tawh a, mipa 1,08,063 leh hmeichhia 1,24,017 an ni a, mipa aiin hmeichhia 15,954-in an tam zawk. Nimin tlai dar 5 thleng khan mi 2,30,601 (99.36%) chhuahtir an ni tawh a, mi 708 (0.30%) thi tawhin, enkawl mek mi 771 (0.34%) an awm.

Nimin tlai dinhmun angin, Mizorama district 11 zingah Siaha district-ah Covid-19 positive an awm tawh rih lo a, district dang zawngah an awm. Enkawl lai tamna ber Aizawl district-ah mi 351 an awm a, Lunglei district-ah mi 165 an awm bawk.