J Thankima College-in zirlai tharte an lâwm

J Thankima College chuan nimin khan Vanapa Hall-ah zirlai tharte lawmna, Freshers' Social an hmang a, minister of state Robert Romawia Royte-in a hmanpui. Minister hian zirlai ti ṭhate hnenah college buatsaih lawmpuina a hlan bakah, music video a tlangzarh.

Robert Romawia Royte chuan, zirna chu retheite tana dinchhuahna kawng tu'ma dan theih loh a ni tih sawiin, "Mizo zinga mi hlawhtlingte hi harsatna paltlangtute an ni a, retheihnain a hneh loh an ni. Hmasawnnain khawsak phung a thlak danglam zel a, nunphung a danglam ta zel a, chu chuan harsatna pawh a thlen ṭhin a, heng harsatnate hi kan hamṭhatna zawk atan hman thiam kan tum tlat tur a ni," a ti a; mimal nun hmasawnna thleng phâk zirna ngaih pawimawh a ṭul thu a sawi.

J Thankima College hi kum 1992-ah din a ni a, principal leh zirtirtu 40 bakah thawktu dang 12 leh zirlai 1,050 an awm mek a ni.