Kawlphethaa hmasawnna sawiho

India-in zalenna a hmuh kum 75-na lawmna, Azadi Ka Amrit Mahotsav pualin nimin khan Aizawl North College-ah sorkar laipuia Power Ministry leh Mizoram State Desinated Agency-te chuan kawlphethaa ramin hma a sawn dan leh hmachhawpte inhrilhfiahna an buatsaih a, Aizawl mayor Lalrinenga Sailo-in a hmanpui.

Lalrinenga Sailo chuan, kawlphethaa ramin hma a sawnna chu ropui a tih thu sawiin, "He hmasawnna hian Mizoram, a bikin Aizawl khawpui a thleng ve em tih chhût a ṭul. Aizawl khawpuia streetlight-te tihên kim la ni lo mah se, khawpui enkawltu tura ruat AMC chuan theihtawpin hma a la ve zel a ni," a ti.

Aizawl Mayor chuan, kawlphethaa harsatna sutkianna turin AMC-in solar plant siam tumin hma a lak mek thu leh, kawlphetha renchem kawngah mi tinin mawh an phurh thu a sawi bawk.

Inkhawma thupui chu 'Brighter India, Brighter @2047' tih a ni a; India ramin kawlphethaa hma a sawn dan te, kawlphetha luh lohna hmuna a luh tawh dan te, mipuiin hma an sawn dan te, ramin zalenna a hmuh champha kum 100 a tlin (kum 2047) hunah chuan tam zawk leh nasa zawka kawlphethaa hmasawn dan tur hmathlirte tarlan a ni.

Inhrilhfiahna hun hi chief electrical inspector R Romawia'n a kaihruai a, Aizawl bawrhsap Dr Lalhriatzuali Ralte leh mi pawimawh dangte'n thu an sawi bawk.