GST hmang thei turin Sorkar leh mipui inbuatsaih ngawrh

Mizoram sorkar Taxation department leh Central Excise and Service Tax commissionerate, Shillong-te chuan nimin khan Chanmari YMA Hall-ah sumdawngte tan Goods and Service Tax (GST) zirhona an buatsaih.

He inbuatsaihna inkhawma khuallian, Taxation minister Lalsawta chuan, GST hman hunah chuan mipuite chhiah pek a zangkhai hret beisei a nih thu a sawi

Taxation Minister chuan, GST chu India sorkar, ram pum mipuite leh sumdawnnain a hlâwkpui ngei a rin thu sawiin, "GST hman hunah chuan chhiah chawi nawn a awm tawh dawn loh avangin mipuite chhiah pek tur pawh tlema hniam zawk tura beisei a ni, " a ti a; Taxation history-a bung thar pawimawh tak kai lai taka mawh phurtu a ni tur chu lawmawm a tih thu a sawi.

July 1, 2017 aṭangin GST hi India ram pumah hman ṭan a nih dawn avangin inbuatsaihna hun tlemtê la awm chu ṭangkai taka hmang turin sumdawngte leh chhiah petute a chah a, hriat thiam loh neih vanga ngaihhnathiam ngawt a rem dawn loh vangin, mi tinin an hriat chian ngei theih nan uar taka awareness campaign neih a pawimawh thu Lalsawta chuan a sawi a, department officer-te pawh mipuite tana ṭhahnemngai lehzuala ṭanala turin a ngen bawk.

Training-ah hian chawhnuah technical session neih a ni a, Central Excise and Service Tax-a deputy commissioner Lalhmingmawia Ralte-in GST-a enrolment, registration leh migration tih dante a sawifiah. Lalhmingmawia chuan, kum khata cheng nuai 10 leh a chung lam bungrua emaw, tha (service) lei chhuakte leh Mizoram páwn aṭanga bungrua la luttute chu GST hnuaiah an inziah luh a ngai a, permanent account number (PAN) an neih vek a ngai tih a sawi. GST hnuaiah online veka thawh a nih tawh dawn avangin sumdawngte’n an account bu felfai taka an vawn a ngai tawh dawn tih uar takin a sawi bawk.

Inkhawmah hian sumdawngte'n an hriat duh hrang hrangte an zawt a, Taxation department leh Commissionerate of Central Excise and Service-a mithiamte'n an chháng a ni.