Raj Bhavan building chei ṭhat hawng

Raj Bhavan buildign chei ṭhat, Heritage Building chu nimin khan Governor Lt.Gen. Nirbhay Sharma leh chief minister Lal Thanhawla ten an hawng. Raj Bhavan building chei ṭhat hi kum 1898-a sak tawh a ni.

Governor chuan, Raj Bhavan chu INTACH, Mizoram Chapter kaltlangin heritage site-ah puan a nih thu sawiin, tuna building thawm ṭhat pawh a tira a lan dan ang theih bera tih a nih thu a sawi a, "A hmanruate pawh a theih anga tam chu a tira mi hman a ni. Raj Bhavan hi Governor chenna mai ni loin, Mizoram leh Mizo mipuite hmel lanna ber hmun pawimawh a nih avangin uluk tak leh mawi taka sak a, a enkawl zuinaah theihtawp chhuah zel a pawimawh ang," a ti.

Chief minister Lal Thanhawla chuan, Raj Bhavan-in Mizoram history-ah hmun pawimawh tak a luah thu a sawiin, "A hmasa berin Superintendent of Lushai Hills chenna niin, Mizoram union territory-a puan a nih hnuah Raj Niwas tih a ni a, Mizoramin state dinhmun a neih hnuah Raj Bhawan tia hriat a ni ta a ni," a ti a; kum 1953-a Prime Minister hmasa ber Jawaharlal Nehru Mizorama a lo zin khan Raj Bhavan-ah a thlen thu a sawi.

Heritage building hawn inkhawmah hian speaker Hiphei, minister te, opposition leader Vanlalzawma leh sorkar official eng emaw zat an tel a ni.