Kolasib kawng dan chhunzawm zel

Kolasib District Hospital-a sur­geon Dr Zothansanga Zadeng, Ser­chhip District Hospital-a sawnna tur transfer order sût phût vanga Kolasib Joint Action Committee-in June 6, 2017 zing aṭanga Kolasib-a NH-54 kawngpui an danchah chu nimin thleng khan an la chhunzawm zel.

Thu dawn danin, Kolasib JAC-in kawngpui an dannaah hian duty turin mi ṭhahnem tak an thawk chhuak a, chung zingah chuan MUP member-te pawh an tel. Kawngpui an danchah ni hmasa ber, June 6-ah Khuangpuilam leh Rengtekawnah an dang a, June 6 zan aṭangin Diankawnah chauh an dang tawh a, zanah pawh zankhuain an dang a ni.

Kawng dan vang hian buaina chhuak a awm lo a, nizan lamah pawh kawng hi dan chhunzawm a ni. Zin veivak engemawzat chu kawng dan avang hian Kolasib leh a chhehvelah an tangkhang a ni.

Saiphai leh Serkhanah pawh nimin khan kawng hi dang tura tih vek a ni tawh a, hun rei lote chhung dan a nih hnuah kawng dan hi tihtawp leh a ni.

Hetih lai hian, Serchhip district Joint Action Committee (JAC) chuan thuchhuah siamin, Kolasib lamin Dr Zothansanga Zadeng chu Serchhipa sawn an remti lo a nih chuan, Kolasib-a surgeon pakhat zawk, Dr Zochampuia chu Serchhipah sorkarin dah mai se an duh thu an tarlang.

Serchhip JAC chuan, Lunglei Civil Hospital-a surgeon pakhat a thih vanga sorkarin surgeon a sîksawiah, Serchhip District Hospital-a surgeon Dr Lalrinmuani, Lungleiah sawn a, Kolasib Hospital-a surgeon pahnih zinga pakhat zawk Dr Zothansanga Zadeng, Serchhipa dah tura ruahmanna a siam chu, 'Sem sem dam dam' tia inkhairual duhna a nih avangin ṭha an tih thu an tarlang. Kolasib JAC-te'n Dr Zothansanga Zadeng a chhuah an remti lo leh sorkar kar nana Mizoram châkkhai lakna kawngpui NH-54 an dang chu pawi an tih thu an sawi.

Hetiang a nih avang hian Serchhip JAC chuan Mizoram mipui tan harsatna nasa zawk a thlen loh nan Kolasib Hospital-a surgeon pakhat zawk Dr Zochampuia chu Serchhip Hospital-a dah mai turin sorkar an ngen a ni.