Zirlaite tan social media Hman thiam a ṭul - Education Minister

National Students' Union of India (NSUI) chuan nimin khan IPR auditorium-ah kumin HSLC leh HSSLC result chhuaka pakhatnate chawimawina hun an hmang a; khuallian, School Education minister H Rohluna chuan, zirlaite tan social media hman thiam a ṭul thu a sawi.

H Rohluna chuan, khawvel hmasawn zelin a ken tel pakhat chu hun khawhralna hmanrua chi hrang hrang - social media, electronic device hrang hrang, games leh thi ldangte a nih thu a sawi a, "Hetiang thil hun khawhralna thil ṭangkai si lo laka insûm thei apiang tan dinchhuahna a awm tawh a ni," a ti.

Mizorama zirlaibute chu all India standard a nih thu sawiin Education Minister chuan, "India ramah a aia changkang zawk a awm bik lo. Chuvangin, Mizo mipuite'n all India service topper kan neih hun hi beiseina nen kan thlir mek a ni," a ti a; zirlai zingah an theihna 100% sual chhuah tumte'n mi dang aia hlawhtlinna an hmuh bik ṭhin thu a sawi.

H Rohluna chuan Mizote chu tlemte mah ni ila theihna sang tak nei eh mi tam zawk te thlenchin thleng ve thei kan nih thu sawiin, "I-League ah kan theihna India in a hmu tawha, zirna khawvel a inelna sang ber berah kan theihnate hi kan lan chhohtir zel a ngai dawn a ni," a ti.

Congress party zirlai pawl, NSUI-in zirlai chawimawina a hlante chu HSLC topper Laldintluanga, HSSLC (Arts) topper Lalrinzuali, science topper Zomuansangi leh commerce topper Joseph Vanlalrema te an ni a; an vai hian NSUI-in lawmpuina thuziak leh laptop an pe a ni.