NERLP collection centre 2 hawng

North East Rural Livelihood Project (NERLP) bultuma thlai thar dahṭhatna tura sak collection center pahnih - Rulchawm leh Ruallung khuaa mi chu June 7, Nilaini khan Rural Development minister R Lalzirliana'n a hawng.

Collection centre hawn puala Rulchawm khuaa BNRGSK Hall-a inkhawm buatsaiah RD Minister chuan, collection center pahnih hawn a ni chu lawmawm a tih thu sawiin, "NERLP hnathawktute hmalakna a fakawm hle a ni," a ti a; a chhawrtu chu mipuite an nih angin, a enkawlzui zelna turah pawh neitu thinlung pua enkawla vawnghim turin a chah.

R Lalzirliana chuan, Mizo tlawmngaihna tla-hniam zel a vei thu sawiin, "Hlawh nei lo chuan hna thawh kan tum ṭhin lo a, hemi kawngah hian mimal tin kan inenfiah a ngai a ni," a ti.

NERLP hi Ministry of DoNER hnuaia mi a ni a, World Bank puihnain thingtlang hnathawk, a bik takin tlangram lo neitute chawikanna project a ni. Project hnuaiah hian India hmarchhak huam chhung chu phase hrang hranga tuam tum a ni a, Mizoram bik hi central leh eastern zone hnuaia awm a ni.

Collection center pa-hnihte hi June 16, 2016-a sak ṭan niin, November 26, 2016 khan sak zawh a ni a; Rulchawma collection center sak nan cheng nuai 12.19 hman niin, Ruallunga collection center sak nan cheng nuai 12.32 hman a ni.