Sorkar rawtna Kolasib-in pawm Kawngpui dan tihtawp beisei a ni

Mizoram sorkarin Dr Zothansanga Zadeng transfer order hnuk kir a, Dr Zochampuia zawk Serchhipa sawn rawtna a siam chu Kolasib JAC chuan a pawm tak avangin, kawngpui danga lungawi lohna lantir pawh vawiin aṭangin tihtawp beisei a ni.

Kolasib JAC hotute hnen aṭanga thu dawn danin, sorkar remruatna thar hi nizan khan Kolasib JAC chuan ngun takin a ngaihtuah a, a thuphunga pawmin, sorkarin Dr Zothansanga Zadeng transfer order a sut rualin kawngpui dan pawh tihtawp ni se tiin an rel a, Mizoram sorkarin doctor a lak thar tur zing aṭangin MD pakhat tal Kolasib-a dah tura ngen ni se tih rel tel nghal a ni.

Health minister Lal Thanzara chuan nimin tlai khan a pisaah thuthar thehdarhtute kâwmin, Kolasib District Hospital-a surgeon sawn chhan a sawifiah a, "Lungleia an surgeon-in vanduaina a tawh avangin, Lunglei khawpuiin surgeon a neih loh ngawt chu ṭhaa kan hriat loh avangin department lamin Serchhipa surgeon Lungleia sawn a, Kolasib lamah National Health Mission (NHM) hnuaia doctor lak nen surgeon pahnih an awm tho avangin, Dr Zothansanga hi Serchhipa awm tura tih a ni," a ti.

Kolasib lamin Dr Zothansanga an chhuah duh loh avangin Serchhip JAC-te chu inhnuk hniamin, NHM hnuaia Kolasib-a awm mek Dr Zochampuia (surgeon) chu Serchhipa sawn mai pawi an tih loh thu sorkarah an thlen tih a sawi a, "Serchhip duh dan ang hi Kolasib lamin rem an tih a, lungawi lohna an lantir hi an tihtawp chuan, Dr Zothansanga transfer order sût nghal a ni ang," a ti a; chu lo chu ruahmanna dang a awm lo tih minister chuan a sawi.

Health Minister sawi danin, Dr Zochampuia hi NHM hnuaia thawk tura sorkarin a sawm a ni a, Kolasib-ah emaw Aizawlah emaw a awm theih dawn chuan thawh a remti a; a duh angin Kolasib-ah dah a ni a, mahse, buaina a reh theihna tur a nih chuan tunah chuan Serchhipa awm pawh a inhuam a ni. Lungawi lohna lantir vanga order siam tawh sa sût chu ṭha lo mah se, Mizoram mipuiin harsatna an tawh loh phahna a nih chuan tlàwma la loin, sorkar chuan transfer order sût a remti a ni.

Lal Thanzara chuan, MPSC kaltlanga doctor 26 lak turah specialist ringawt pawh diltu mi 35 an awm thu a sawi a, "Doctor-te hi lak an nih hunah chuan a mamawhte hnenah sem darh a ni ang," a ti.

Dr Zochampuia sawn chhuaha Dr Zothansanga Zadeng transfer order sût chungchang hi Kolasib JAC-te chuan nizan khan an ngaihtuah a, sorkar remruatna chu an pawm thei a, kawngpui dan tihtawp thu erawh chu DrZothansanga transfer order sorkarin a sut ruala puan ve nghal turin an rel a ni.

Kawngpui dan a nih avang hian phai lama chawhmeh la ṭhinte chuan cheng nuai 60 chuang man thlai a chhiat phah tawha an hriat thu thuthar thehdarhtute an hrilh.

Mizoram hmun hrang hrangah phai lam aṭanga lo lut thil chi hrang hrang a harsa ṭan hman a, tui­alhthei phei chu coupon pawhin supply department permit nei hnenah chauh pek a ni.