Green Mizoram Day hman a ni
Green Mizoram Day 2017 chu nimin khan district hrang hrangah hman a ni a, Aizawlah chuan chief minister Lal Thanhawla hoin Chite lui kamah hman a ni. Green Mizoram Day-ah hian thing ṭiak ṭhahnem tak phun a ni a; kum 1999-a hman a nih aṭanga kum 2016 thleng khan thing ṭiak 36,58,174 phun a ni tawh.
Chief Minister chuan, mipui náwlpui, ṭhangthar leh pawl hrang hrangin ram siamna leh humhalh kawnga thing phun nachang an hria chu lawmawm a tih thu sawiin, "Thing phun sate humhalh leh enkawlna lama kan ṭhangharh ta hi thil lawmawm tak a ni a, changkanna a kâwk a ni," a ti a; YMA leh khawtlangte pawh ramngaw, nungcha leh sava leh lui dungte humhalh kawngah an harh hle tawh tih a sawi.
Thing leh mau, nungchate leh luite humhalh kawnga hmalak chu sorkar tih tur chauh a ni lo tih sawiin Lal Thanhawla chuan, "Mi tinin mawhphurhna leh tih tur kan nei a, ram kan humhalh loh chuan nakinah kan thlàn koa kan tu leh fate'n ànchhia min hlawh ang tih a hlauhthawnawm a ni," a ti.
State Level Committee on Green Mizoram chairman Lal Thanhawla, chuan, tunah chuan Chite lui a chhe zo tawh tih sawiin, pawi a tih thu a sawi a, "Lui kama ramte hi sorkarin humhalh nacháng lo hriat tur a ni a, tunah chuan a tlai zo tawh a, a pawi hle a ni," a ti. Chite lui humhalh tura Save Chite lui movement kalpui a ni chu lawmawm a tih thu sawiin, Governor Lt. Gen. Nirbhay Sharma leh Aizawl DC Kannan Gopinathan ten an phurpui chu lawmawm a tih thu a sawi.
Inkhawm kaihruaitu, chief secretary Lalmalsawma chuan, Chite lui kama Green Mizoram Day hman a ni chuan Chite lui humhalh kawngah rah ṭha a chhuah ngei a beisei thu a sawi.
Aizawla Green Mizoram Day hmannaah hian Assembly speaker Hiphei, minister H Rohluna leh Dr BD Chakma, deputy speaker R Lalrinawmna, parliamentary secretary pathum Lt.Col.. ZS Zuala, Joseph Lalhimpuia leh K Lalrinthanga leh sorkar official-te an tel.
Sorkar hotute hian thing ṭiak an phun nghal a, CM Lal Thanhawla'n thing a phun chu May 18, 2017-a thi, Union Enviromment & Climate Change minister Anil Madhav Dave hriatrengna atan a hlan.
Green Mizoram Day pual hian nimin chhun khan sorkar department leh pawl hrang hrang 55-in Chite lui kam hectare 1.5 vela zauah thing ṭiak 1,200 chuang an phun a; Mizoram pumah thing ṭiak 6,00,000 chuang a awm. Nimin vek khan Pachhunga University College leh T Romana College zirlai 100 velin Chite lui dung thian fain an hnatlang bawk.
Inkhawmah hian Chief Minister-in kângmei venna kawnga district ti ṭha te leh Aizawl district bika ti ṭha khuate hnenah lawmman a hlan. Lawmman dawngtute chu - district level-ah pakhatna Kolasib district, pahnihna Lunglei district leh pathumna Sechhip district an ni a; Aizawl district bikah pakhatna Phulmawi, pahnihna Saitual V/C-III leh pathumna Sihhmui te an ni.