Lirthei táng enkawltute ei leh in tur pe

Kolasib Joint Action Committee-in doctor pakhat sawn chhuahna thupek sût phûta kawng-pui an dahchah avangin lirthei eng emaw zat a tangkhang a; chu'ng lirthei tangkhang enkawltu driver leh handyman-te chu nimin khan kohhran pawl ṭhenkhat ṭhalaite'n ei tur an sem.

Lirthei tangkhang enkawltu eng emaw zat chu Kolasib Venglai Presbyterian Kohhranin an sunday school hall-ah an awmtir a, Kolasib Venglai Branch KṬP-te'n ei tur an siamsak. Thingdawl Venglai Branch KṬP chuan nimin chhun khan lirthei tangkhang enkawltute chu thingpui leh a hmeh an sem a ni.

Salvation Army Youth, Kolasib corps-te chuan June 8, Ningani zan khan Kolasib Diakkawn leh Rengte Tlangsang inkar lirthei tangkhang enkawltute chu tui, buhfai, dal leh biscuit an sem a; nimin khan Kolasib aṭanga Aizawl lam kawnga tangkhangte hnen-ah buhfai leh ei tur chi hrang hrang an sem bawk.

Kolasib Venglai Branch YMA pawhin nimin khan lirthei tangkhang enkawltute te ei leh in atan an veng chhungah vehbûr an khawn a, chhungkaw tam takin buhfai leh chawhhmehte an thawh a ni.