Sorkarin tuialhthei a khuahkhirh

Food, Civil Supplies & Consumer Affairs (FCSCA) department chuan thupek thar a tichhuak leh a, Mizorama filling station (petrol pump) zawng zawngte chu tuialhthei an neih zat ni tin vawi thum, FCSCA department-ah hriattir turin a ti.

FCSCA thuchhuah chuan, "Union Home Minister a lo kal dawn avangin MS and HSD mamawhna a san avang leh Joint Action Committee, Kolasib-te'n road block an la kalpui zel avangin POL product phurh luh theih a nih lo a, filling station zawng zawngin an zawm turin office order chhuah thar leh a ni," a ti.

Supply department thupek chhuah dan chuan, filling station zawng zawngte chuan ni tin zing dar 9, chhun dar 12 leh tlai dar 4-ahte tuialhthei an neih zat FCSCA pisaah an hriattir ṭhin tur a ni a; hriattirna tur telephone no. chu 0389-2314175 leh 0389-2316178 a ni.

Tuialhthei hi FCSCA permit tel lo chuan cash coupon pawhin pek chhuah phal a ni lo a; petrol pump-te chu FCSCA department aṭanga thu hmu lo chuan khawiah mah an pe chhuak tur a ni lo. Thupek zâwm lote chu an licence tihtawp thlenga hrem theih an ni.