Zir zo tawh hna hmu lote thla tin stipend kan pe dawn - R Lalthangliana

MNF vice president Dr R Lalthangliana chuan, MNF a sorkar hunah State Human Right Commission an din dawn niin a sawi a; lehkha thiam, zir zo tawhte chu hna an hmuh hma zawng thla tin stipend an pe dawn niin a sawi bawk.

Nimina Lengpui community hall-a MNF Mamit East Block-in SEDP zirhona an buatsaihah thu sawiin R Lalthangliana chuan, Congress sorkar hnuaiah thuneitute'n a dik leh dik lo thlu loin mipui an palzût fo niin a sawi a, "He mi laka mipui ven nan leh an thlavang hauh nan, MNF kan sorkar hunah High Court Bench satliah mai duh tawk loin, independent body-in State Human Rights Commission kan din dawn a ni," a ti.

Dr R Lalthangliana chuan, SEDP-in mihringte dam chhung khawsakna atana pawimawh leh ṭangkai a huam tel vek nia sawiin, "Lehkha thiam, B.A, M.A leh a tlukpui zir zo tawh te, sum tam tak sênga thil training chhuak tawh hna la hmu lo te, doctor leh engineer training chhuak tawh thawh tur hre mai lote pawh thla tin hna an hmuh hma chu stipend angin pawisa kan pe dawn a, hna an hmuh ngei theihna turin ruahmanna siam a ni," a ti.