MHMSA member-te'n hna an chhunzawm

Mizoram Health Multipurpose Service Association (MHMSA) chuan an Recruitment Rules (RR) siamṭhat phûta an hna aṭanga an chawlh chu June 8, Ningani tlai dar 5:30 khan an titawp a, nimin aṭang khan an awmna ṭheuhah hna an chhunzawm.

MHMSA chuan thu chhuah siamin, an RR siamṭha tura an phût vanga kawng hrang hranga lungawi lohna an lantir hnuah, June 8 chawhma lam khan Health minister Lal Thanzara chu an hmu leh tih an tarlang a; an thu thlente ṭha taka lo dawngsawngin, telephone-in Health Secretary a biak nghal bakah, lehkhain RR tihdanglam chungchang chu ngaihtuah ṭha leh turin a ti niin an sawi.

MHMSA chuan, "Patling thluak nêm tak, mi hriatthiamna nei mi tak minister kan nei hi kan chhuang a, a enkawlnaah hian health programme chak lehzuala a kal zel kan beisei a, amahah rinna kan nghat tak meuh a ni," an ti.

MHMSA-ah hian health worker, health supervisor leh community health officer-te an tel a; RR tihdanglam an phût avang hian kawng hrang hrangin lungawi lohna an lantir a ni. May 15-19, 2017 chhungin badge dum an bel a, May 22-26 chhung pen down strike an nei a, May 29 - June 2 chhung mass casual leave an lak hnuah, June 5 aṭangin tiam chin awm loin chawlh an la a, June 8 khan an titawp ta a ni.