Social media a ṭha zawnga hmang turin chah

School Education minister H Rohluna chuan, social media - WhatsApp leh Facebook-te chu a ṭha zawnga hman ṭangkai tum turin zirlaite a chah.

MZP sub-head-quar-ters, Thenzawl-in kumina MBSE leh CBSE hnuaia pawl 10 leh pawl 12 pass thar, first division-a tling chinte lawmpuina hun nimina Thenzawl Joint YMA Hall-a an buatsaihah thu sawiin, H Rohluna chuan, "Social media-te hi zirna kawnga zirlaite hmasawntir theitu a nih theih nan zirtirtute'n tan an lak a, zirlaite hriat loh hrilh nan hman a pawimawh. Zirna lam hlamchhiah phah nan kan hmang a nih chuan min tichhetu a ni thei," a ti.

Education Minister chuan, zirtirtute chu fawmkem ngah lo tura chahin, "Kohhran leh khawtlanga inhman a ṭhat rualin, an eizawnna an ngai pawimawh ber tur a ni. An zirlaite dinhmun an hre chiang tur a ni a, sikul chhungah chauh ni lo, hmun dangah pawh an zirlaite an ngaihsak tur a ni," a ti a; zirtirtute leh zirlai nu leh pate an ṭanrual a ngaih thu a sawi.

Thenzawl MZP hian an huam chhunga kumina MBSE leh CBSE hnuaia pawl 10 leh 12 first division-a a aia sanga pass zirlai 57 hnenah leh Thenzawl High School-a zirtirtu thawk ṭha 12 hnenah lawmpuina leh chawimawina an hlan a; chawimawina thuziakte chu Minister H Rohluna'n a hlan a ni.