District tinah Green Mizoram Day hmang

Nimin khan Mizoram hmun hrang hrangah Green Mizoram Day 2017 hman a ni a; district tinah thing ṭiak ṭhahnem tak phun a ni. Kumina Green Mizoram Day thupui chu, 'Thiing phun la, tuihna siam rawh' tih a ni.

Green Mizoram Day hi Lungleiah chuan Pukpui Centenary Lungphun hmunah hman a ni a, Horticulture minister PC Lalthanliana khuallian a ni.

Lunglei District Green Mizoram Committee secretary H Lianmawia, Lunglei DFO-in report a pek danin, kuminah Lungleiah sorkar department leh pawl 70-te'n thing phunna tur plot 27 siamah thing ṭiak 517 an phun dawn. Thing phun enkawl ṭha leh kângmei veng kawnga thawk ṭhate hnenah lawmman sem a ni a; Mizoram Polytechnic, Lunglei BDO office leh JB College NSS-te thing phun enkawl ṭhate niin, Zobawk South V/C, Mausen V/C leh Upper Lungrang South V/C-te chu kângmei veng ṭha khuate an ni.

Siahaah chuan zing dar 7-ah DC Office Complex-ah a hawnna inkhawm neih a ni a, DC leh District Committee on Green Mizoram chairman Harleen Kaur khuallian a ni. Thing an phun nghal bakah, thing phun an sem nghal.

Siahaah hian kumin Green Mizoram Day puala sorkar department hrang hrangin thing an phun tur mamawh zat an sawi chu 1,905 a ni a, chu'ngte bakah chuan thingtlangah thing ṭiak 1,700 sem tum a ni. MADC Forest department-in thing ṭiak a semte chu - Lamkhuang, Thlado, Ngiau, April, Silver Oak, Hmáwng, Khuangthlí,Theihai leh Káwltheite a ni.

Mahni ram huam china kângmei veng ṭha leh ramngaw humhalh ṭha zualte hnenah lawmman hlan a ni a; pakhatna Saikao, pahnihna Lohry leh pathumna Tisopi an ni.

Serchhipah chuan District Green Mizoram Committee ruahmanna angin Green Mizoram Day 2015-a sorkar department leh pawl hrang hrangin Zawlpui kawnga thing an phun tawhte sâmfai hnatlang neih a ni a, thing ṭiak eng emaw zat an phun belh nghal.

Thing phun hawnna inkhawm hi Zawlpui kawng péngṭhuamah neih niin Serchhip DC Sangchhin Chinzah khuallian a ni a; an district-a kângmei venna kawnga thawk ṭha khuate hnenah lawmman hlan niin, pakhatna Bungtlang, pahnihna Sialhau leh pathumna Thenzawl East V/C-te an ni.

Mamitah pawh Green Mizoram Day hi Mangkhawngdai Field-ah hman a ni a, Mamit DC Lalbiaksangi khuallian a ni. Mamit leh Bairabi inkar kum hmasa lama thing an phun tawhte chu sorkar department leh pawl hrang hrangin enkawlin, sâmfai hnatlang an nei a; thing phun thi tawh awmnaah phun thar leh nghal a ni.

Inkhawmah hian Mamit district-a kângmei veng ṭha khuate hnenah lawmman hlan a ni a; pakhatna Suarhliap, pahnihna Lallen leh pathumna West Bunghmun khuate an ni.