Ramri hung hna chawlhsan turin MHA-in a hungtute a hriattir

Sorkar laipuia Ministry of Home Affairs chuan, Mizoram khaw thlang lama India leh Bangladesh inrìna hung hna thawh ṭan mekte tàwpsan tur leh, ramri la hung ve lohna khuate hung chhunzawm tawh lo turin a hriattir.

India leh Bangladesh inrìna hung hna hi kum 2005-ah thawh ṭan a ni a, chhan hrang hrang vangin zawh hun turah zawh theih a ni lo a, ṭum tam tak zawh hun tur pawhsei tawh a ni.

Ramri hung hna thawh mek tihtàwp a nih tur thu hriattirna chhuah a nih hma hian, sorkar laipuiin ramri hungtute chu an hna thawh zawh nan March 31, 2019 thleng hun a lo pe tawh.

Ramri hung hna kalpui mek hi Enginee-ring Projects India Limited (EPIL) leh National Projects Construction Corporation Limited (NPCC)-ten an vil a; Mizoram khawthlang lama ramri hung tur km. 233-ah EPIL-ten km. an chang a, NPCC-ten km. 150-a thui an vil thung.

EPIL hotute sawi danin, an enkawlna hnuaiah 90% vel hung zawh a ni tawh a, ramri hung zawh tawh tam zawk chu ramri vengtu Border Security Force (BSF) kutah an hlan tawh. Hetih lai hian, NPCC enkawlna hnuaia km. 150-a thui ramri hung turah a zahve vel thawh zawh a ni tawh bawk.

EPIL leh NPCC hotute chuan, sorkar laipuia Ministry of Home Affairs hnuaia Border Management-in ramri hung hna thawh mek tàwpsan tura a hriattir chhan chu, Madhukar Gupta Committee-ten ramri an tlawh report an thehluh tâk bawhzuina a nih thu an sawi.

Kumin February thla tira Madhukar Gupta hoa mi pawimawhte'n Tlabung leh a chhehvel an tlawh ṭumin, ramri vengtu sipai hotute an kàwm a; an thil hmuhte an thehluh dan azirin sorkar laipuiin hma a rawn rawn la nia an hriat thu an sawi bawk.

Sorkar laipuiin ramri hung hna thawh ṭan mek a tihtàwp bakah, ramria êng chhit (border flood lighting) hna kalpui ṭan mek pawh tihtàwp a ni ve nghal. Hetih lai hian, ramri hung hna thawh zawh ṭep tawhte leh êng chhit hna tam zawk thawh tawhte erawh chu chhunzawm zel tur a ni thung.

Sorkar laipui thupêk vang hian, Tlabung sub-division huam chhung bika khaw pathum - Nunsuri, Malsuri leh Saisen Basti-ahte ramri hung a ni ve dawn ta lo tih EPIL hotute chuan sawiin, "Heng khaw pathuma ramri hung hna kalpuina tur ruahmanna siam mek ni mah se, sorkar laipui thuchhuak vang hian kan hung tawh loin kan ring," an ti a; khaw pathuma ramri hung a nih ve nghal lohna chhan chu khaw mipuite'n a tirah an dodàl vang a nih thu sawi.

Indo-Bangla ramri hung hna thawh ṭan leh tun hnaia êng chhit hna thawh ṭan tâkte tihtàwpna thupêk chhuah ni mah se, ramri dep hmun hrang hrangah sipaite chênna border outpost erawh sak chhunzawm zel tur a ni a; hemi chungchangah hian EPIL leh NPCC-te chu report thehlût tura hriattir an ni.