Leimin vangin mi 2 an thi

Nimin tlai dar 4:45 vel khan Zemabawkah Assam type in leiminin a hnâwl a, Laldinpuii (29) a thi. Nimin tlai vek dar 5 vel khan Aizawl aṭanga Khumtung thlen hma deuh quarry-ah leiminin pick-up a chhilh a, Lalremruata (39), Dawrpui Vengthar a thi.

Zemabawk YMA hruaitute hnen aṭanga thu dawn danin, leiminin in a hnâwl lai hian a chhungah in neitute leh an inléngte nen mi 13 an awm. In hi chhawng hnih a ni a, Laldinpuii leh a fapa thla sarih mi chu in hnuaiah awmin, a bâk zawng chu in chungah an awm a, in chhawng chung zawka awmte chu a chim hmain an tlân chhuak hman.

Laldinpuii leh a fapa chu an tlan chhuak hman lo a, Laldinpuii chu a thi a, a fapa chu damdawi-in lamah enkawl mek niin, ngaihtuahawm lutuk a ni lo. Khawtlang mipuite chu nimin khan bungrua vel senghawiin an hnatlang a ni.

Khumtung YMA hruaitute hnen aṭanga thu dawn danin, Khumtung leh Muallungthu inkara tlan pick-up chu leiminin chhilhin, a hma lam zawng a chhilh vek a, motor khalh­tu Lallawmawma, Din­thar Veng leh Lalrem­ruata te an chuang. Lei­vungte thenfai a nih chuan Lalremruata chu a lo thi tawh a, Lallawmawma chu hliamin, State Referral Hospital panpui nghal a ni.

Lalremruata ruang hi Khumtungah lak a ni a, a khaw hall-ah thlahna hun hman a nih hnuah Aizawl panpui a ni.