Union Home Minister pahnih lo zin dawn

Union Home minister Rajnath Singh leh minister of state for Home Kiren Rijiju te chuan, vawiin hian Mizoram an rawn thleng dawn a, zan khat an riak ang.

Sorkar aṭanga thu dawn danin, Home mi­nister-te hi hmarchhak biala Myanmar dep state hrang hrang palia chief minister-te leh Home minister-te nen ramria thil awm dan thlirho an tum a ni.

Union minister-te hian chhunah Lengpui Air­port an thleng dawn a, Lengpui aṭangin heli­copter-in Ṭhuampui helipad-ah an ṭum ang a, chuta ṭang chuan Raj Bhavan an pan ang.

Tlai dar 3-ah hmarchhak state pali Chief Minister-te leh Home minister-te nen Assembly Annexe con­ference hall-ah an inkâwm dawn a, Myanmar ramri hrûla thil awm dan an thlirho ang. Tlai dar 4-ah Assembly Annexe conference hall-ah press conference an nei dawn bawk.

Ramri chungchang sawihona meeting-ah hian Mizoram aṭang­in chief minister Lal Thanhawla leh Home minister R Lalzirliana an tel ang a; Manipur CM N Biren Singh, Nagaland Home minister Y Tatton leh Arunachal Pradesh deputy chief minister Chauna Mein-te an tel dawn a ni.

Home minister-te hian naktuk chawhma lamah Champhai emaw, Parva emaw, a remchang zawk zawk an tlawh dawn a, ramri vengtu sipaite hnathawh dan a hmunah an enfiah dawn a ni. Chawhnu lamah Mizoram chhuahsanin New Delhi an pan ang.