Mipa 80.4% leh hmeichhia 59.2%-in Vaihlo aṭanga thil siam an khawih

National Family Health Survey 2015-16 chhunga neihah, Mizoramah mipa zawng zawng zinga 80.4% chuan vaihlo aṭanga siam chhuah an ti (zu, hmuam, ei) a; hmeichhia zingah 59.2%-te'n an ti thung.

World No Tobacco Day (May 31) puala June 9, Zirtawpnia Assembly Annexe conference hall-a seminar-a an tarlan danin, kumin April leh May thla chhunga Aizawl Civil Hospital-in damlo phai kal tura a tih (refer) zat zirchianna a neihah, damlo refer 66.66% chu vaihlo khawih ṭhin an ni a, 73.08% chuan vaihlo tih vanga natna awm thei an nei a, cancer natna nei inenkawl mek zinga 83.33% chuan vaihlo an ti ṭhin bawk.

Hetih lai hian, Global Adult Tobacco Survery 2009-2010 ah chuan, Mizoram chu India rama vaihlo hmang nasa ber a ni a; vaihloa mipuiin sum an hman ral zat chu ni khatah cheng nuai 60.93 vel, thla khatah nuai 1827.84 vel leh kum khatah nuai 21,934.07 vel zet a tling a ni.

World No Tobacco Day puala seminar hi Mizoram State Tobacco Control Society leh In­dian Society on Tobacco & Health (Mizoram Chapter)-te buatsaih a ni a, chief secretary Lalmalsawma'n kaihruai­in, chief minister Lal Thanhawla khuallian a ni.

Chief Minister chuan, vaihlo leh a kaihhnawih do hna thawk turin ṭan tlan a ṭul thu sawiin, "Kohhran leh tlawmngai pawlte pawhin tun aia nasa zawka ṭan an lak a ṭul," a ti a; zirna-in, biak-in leh in chhung khurahte vaihlo ṭhat lohzia inzirtir tam a ngaih thu a sawi.