KHAWTHLIR

Free clinic
St. Paul's High School-a 1992 batch-te chuan an batch silver jubilee pualin Thutak Nunpuitu Team hmunah free medical clinic an buatsaih a, mi 146-te hriselna dinhmun enfiahin, mi 120 chuang Hepatitis-C screening an tihsak a, damdawi, thawmhnaw, naupang inawmna leh ei turte an pe nghal. St. Paul's HS 1992 batch-te hian Inrinni vek khan Mizoram State Cancer Institute-ah Rs. 50,000 an hlan bawk.

KTP Day
Evangelical Church of Maraland (ECM) Kohhrana ṭhalai pawlte chuan, Inrinni khan KTP Day vawi 70-na an hmang. KTP Day hi tualchhung kohhran hrang hranga KTP-te'n an biak-inah an hmang a, thupui chu 'Nun Krista' tih a ni.

Ruhro lai chhuak
New Secretariat Complex-a District Court building sakna tura lei laihnaah June 10, Inrinni khan ruhro laih chhuah a ni a; police, Forensic Science Laboratory-a mithiamte leh Khatla Branch YMA hruaitute'n a hmunah enfiahin, Aizawl Police Station-ah lak a ni. Ruhro hi thawmhnaw ṭhenkhat, ngûn leh slipper aṭangin hmeichhe ruhro a nih rin a ni.

NLUP sem
NLUP leh RKVY convergence scheme hnuaiah, Inrinni khan Tuikum biala sapthei chíngtu chhungkaw 444 hnenah NLUP second instalment sem a ni. NLUP sem inkhawm hi Baktawng community hall-ah neih a ni a, MIFCO chairman PC Zoram Sangliana'n a hmanpui.