Kolasib kawng dan tihtawp a nih vangin Mipui nitin mamawh a ziaawm tawh

Kolasib Joint Action Committee-in Kolasib District Hospital-a thawk surgeon, Dr Zothangsanga Zadeng sawn chhuahna thupek sût phûta June 6, 2017 aṭanga tiam chin awm loa Kolasib-a NH-54 kawngpui an danchah chu June 9, Zirtawpni zan dar 10:20 khan an titawp a, mipui nitin mamawh pawh a ziaawm tawh.

Kawngpui dan an tihtawp chhan hi, thil phût anga Dr Zothansanga Zadeng sawn chhuahna thupek sorkarin a sût vang a ni.

Kolasib JAC hian June 9 tlai khan sorkar rawtna ngaihtuahin an ṭhukhawm a; rawtna - Dr Zothansanga transfer order sût a, surgeon pakhat zawk Dr Zochampuia chu Kolasib aṭanga Serchhipa sawn an remti a ni. Sorkar rawtna hi an pawm hnuah pawh kawngpui dan an titawp mai lo a, sorkarin Dr Zothansanga transfer order a tihchhuah hnuah an titawp ta chauh a ni.

Health secretary Lalrinliana Fanai chuan Dr Zothansanga Zadeng transfer order sûtna thupek a tihchhuah rual hian, Kolasib aṭanga Serchhipa Dr Zochampuia sawnna thupek a tichhuak nghal bawk.

Kolasib-a kawngpui dan chungchanga Health minister Lal Thanzara'n June 9 tlaia thuthar thehdarhtute a kawmnaah, Dr Zochampuia chu sorkarin NHM hnuaia thawk a, Aizawl emaw, Kolasib emawa awm tura a sâwm chhuah ni mah se, buaina leh harsatna chinfelna a nih chuan Serchhipa awm a inhuam thu a sawi a ni.

Hetih lai hian, Serchhip Joint Action Committee chuan June 10 khan thuchhuah siamin, Kolasib JAC-in kawngpui an dan chungchangah, Mizoram mipuiin harsatna lian zawk an tawh hmaa Serchhip JAC ngenna Mizoram sorkarin a tihlawhtling leh Dr Zochampuia, Serchhip Hospital-a a dah chu lawmawm an tih thu an tarlang.

Serchhip JAC chuan, "Dr Zochampuia hi Serchhip district mipuite'n Serchhip a rawn thlen a, a hna a zawm hun kan nghakhlel hle a, Serchhip district tan malsawmna thlentu a nih ngei kan ring tlat a ni," an ti a; Kolasib JAC-in kawngpui dan an titawp chu lawmawm an tih thu leh, sorkarin doctor 26 lakna tur a buaipui mek chu thlamuanthlak an tih thu an tarlang bawk.