AR Ex-Servicemen-te'n rally buatsaih

46 Assam Riffles leh Assam Riffles Ex- Servicemen, Mizoram ṭangkawp chuan Inrinni khan 46 AR hmuna Loch Hall-ah Assam Riffles Ex- Servicemen Rally an hmang a, Governor Lt.Gen. Nirbhay Sharma-a'n a hmanpui.

Governor chuan, Mizoram chhunga ex-servicemen-te chu an inthlung ṭha hlea a hriat thu sawiin, "Mizoram hmun hrang hrang ka fan tawh aṭanga ka hmuh dan chuan, khaw tinah ex-servicemen-te mi zahawm leh entawn tlak vek niin ka hmu a ni," a ti a; ex-servicemen-te chu an ṭhat lai hunte ram venhimna atan hmang tawh mah se, ram leh hnam hmelma hrang hrang do kawngah pawh sorkar, tlawmngai pawlte leh vantlang pui chhunzawm zel turin a chah.

Rally puala inkhawm hi Assam Rifles DIG Brig. MS Mokha-a'n a kaihruai a, AR Ex-Servicemen president, Sub.Maj. Thangzika'n rally an neih chhante a sawi bakah, sipai huaisen thi tawh nupuite hnenah lawmman sem a ni.

AR Ex-Servicemen Rally-ah hian ex-servicemen-te tan a man chawi loa doctor ràwn theihna hun leh an harsatna hrang hrang awlsam taka chinfel theihna tur hmun hawn a ni.