Thanzara'n MCSA conference a hmanpui

Mizoram Civil Service Association (MCSA) chuan June 9, Zirtawpni khan Berawtlanga Tourist Complex-ah General Con-ference vawi 42-na an hmang a, Health minister Lal Thanzara'n a hmanpui.

Minister chuan, MCS offi-cer-te chu sorkar neitu tak tak an nih avangin, kawng engkimah neitu chan chang tura ngaih an nih thu a sawi.

Lal Thanzara chuan, MCS officer-te chu sorkar neitu tak tak an nih avangin mi dang aia inpe zo leh sorkar hmakhua ngaia sorkar tana rinawm tlat tura beisei an nih thu a sawi a, "Khawvel a changkan zel rualin hna thawhna kawnga thiamna leh hriatna mamawhte a changkang ve zel a, hotute thurâwn dik leh ṭha petu tur officer sorkarin a mamawh lehzual a ni," a ti.

Sorkar ṭha taka a kal theih nan inrêlbawlna a bulṭhut aṭanga a fel a ngai a, chutiang tur chuan sorkarin hma a lak mek thu sawiin Lal Thanzara chuan, "Administrative reforms chungchangah sorkar finchhuah zel turin ka ngen che u," a ti.

MCS officer-te chu an hnathawhna leh ni tin nunah integrity vawng nun tlat tura chahin Minister chuan, "Kan hlawh zat leh kan thil neih te, kan fate zirna senso âwm angte leh kan nunphung hrim hrimte hi ṭhenawm khawveng leh mipui mimir hian an thlir thiam ve vek a ni tih hre reng chungin, mahni hlawh leh sorkar hriatpuina a kan lak luh mila nun thiam kan zir a hun ta hle a ni," a ti a; an awmna ṭheuhah zahngaihna leh tlàwmna nena inthuam a, an thuneihna hmang sual lo turin a chah.

MCSA conference-ah hian an president Lal-zirmawia Chhangte pawhin thu a sawi a; kum 2016-17 chhunga an member thi mi panga sûnna hun hman a nih bakah, member thar MCS 2017 batch-te lawmna hun hman a ni.

Conference-ah hian chawhnu lamah ro an rel a; kum 2017-19 chhunga MCSA office bearer atan president-ah Lalzirmawia Chhangte, vice president-ah K Laldingliana, general secretary V Lal-engmawia, assistant secre-tary H Lalhmingthanga, treasurer H Lalchhandami leh finance secretary Paul L Khuma te an ni.