Hmun hrang hrangah heroin man a ni

Central YMA hnuaia ruihhlo dotu, Supply Reduction Service (SRS) chuan Inrinni zing khan Hunthar Veng leh New Market-ah heroin hawng 6 leh a neitua puhte an man. Ruihhlo an man hi Rs. 2,70,000 vel hûa chhût a ni.

Mizoram Police-a Aizawl DEF, District Special Branch leh Aizawl Police Station-a mite chuan Bethlehem Vengthlangah Vanlalsanga (20) s/o Buangthanga (L), Bilkhawthlir Tuiṭha Veng, tuna Bethlehem Vengthlanga khawsa mek hnen aṭangin heroin hawng 2 leh can 26 an man a; Rs. 1,55,000 hû a ni.

Mizoram Police-a CID-te pawhin June 9, Zirtawpni zing dar 7:30 vel khan Lalrintluangi (32) d/o Khuangzika, Tahan, Myanmar (Electric Veng, Aizawla khawsa mek) nia insawi hnen aṭangin hroin hawng 30 an man bawk. Heroin man hi cheng nuai 15 vel hû a ni.

SRS hruaitute chuan, tunlai hian Aizawl leh a chhehvelah Myanmar aṭanga tawlh luh heroin a tam niin an sawi a; kar kal ta chhung khan Excise & narcotics, Police leh SRS-te'n heroin hawng 60 chuang an man a ni.