Mipa leh hmeichhe intluktlanna zirho

National Council of Churches in India (NCCI)-in June 5-10, 2017 chhunga, Synod Conference Centre-a mipa leh hmeichhia intluktlanna chungchang leh a kaihhnawiha Certificate Course on Gender Studies an buatsaih kharna inkhawm chu June 10, Zirtawpni tlai khan chief minister Lal Thanhawla'n a hmanpui.

Chief Minister chuan, India rama hmeichhiate dinhmun leh an chan ngaihtuahin, hmeichhiate chawikanna kawngah thawh tur leh tih tur a la tam thu a sawi a, "Mizorama Kristianna a thlen hma chuan Mizo hmeichhiate dinhmun a ṭha lo a, Kristian kan nih hnuah chuan nasa takin a inthlak a, vawiinah chuan Mizo society-ah hmeichhia nih vanga en hranna a awm tawh loin ka hria. Chuti chungin, an dinhmun siam ṭhatna kawngah tih tur a la awm niin ka hria a ni," a ti.

Ram chhung hmun hrang hranga hmeichhiate chunga hleilenna rapthlak tak tak thleng ṭhinin rilru a tihhrehawm thu sawiin Lal Thanhawla chuan, "Dan leh hrai inzirtirna leh inhrilh zauna lam, legal awareness programme angte buatsaih tam a ṭul," a ti a; NCCI-in hmeichhiate dinhmun leh intluktlanna atana thil pawimawh leh ṭulte zirna an buatsaih chu fakawm a tih thu a sawi.

Synod senior executive secretary Rev. Lalramliana Pachuau, Presbyterian Womens' Fellowship chairperson K Lallian-tluangi leh NCCI hruaitu Moumita Biswas-te pawhin thu an sawi.

Certificate course-ah hian Mizoram bakah, India hmar-chhak state hrang hrang leh Orissa leh West Bengal-a kohhran hrang hrang rawng-bawltute an tel a ni.