Mizoramah Union Home minister Rajnath

Union Home minister Rajnath Singh hoin nimin khan Assembly Annexe conference hall-ah hmarchhak state zinga Myanmar nen ramri neite'n ramri chungchangah an sawiho. Meeting neih zawhah Vanglaini palai zawhna chhangin Rajnath Singh chuan ei tur atana duhthlan kawngah khuahkhirhna dan a awm loh thu a sawi.

Rajnath Singh hian meeting a neih zawhah thuthar thehdarhtute kawmin, 'India ram puma bawng sa ei khap tumna a awm nia sawi' a dik leh dik loh chungchanga Vanglaini palai zawhna chhangin, "Ei tur atana duhthlan kawngah inkhuahkhirhna dan engmah a awm lo," a ti.

Sorkar laipuiin hmarchhak bialah hmasawnna hnathawh a intiam tih sawiin Rajnath Singh, "A tahtawlin hmasawnna hna thawh chhoh zel a ni. Kawng, rel, air transport, power, zirna leh hriselna lamah hmalak a ni," a ti a, hun rei lo teah hmarchhakte'n smart city project hnuah modern cities a neih tur thu a sawi.

Union Home Minister chuan ramri hnaiha chengten an mamawhte an neih a pawimawh tih sawiin, state sorkarte chu ramri hrula chengte tan hian kawng, power, inbiak pawhna, hriselna leh zirna lama thuk zawka ngaihtuahna hmang turin a chah.

Rajnath Singh chuan ramri hrula chengte'n harsatna an neihte zir chiang turin Border Management Secretary kaihhruaina hnuaiah committee din a nih dawn thu sawiin, "Heng an harsatnate hi short term (kum 3), medium term (kum 3-6), long term (kum 6-10) chhung atana chinfel tura thliar hran tur a ni," a ti a, committee hi December 31, 2017 hmaa an report thehlut tura tih an nih thu a sawi.

Myanmar leh India inkalpawhna kawng siamṭhat leh inkungkaihna neih ṭhat zel chu Myanmar ramri depa awmte'n nakin zelah pawimawhna thui tak an neih dawn thu sawiin Union Home Minister chuan, "He mi atan hian state leh sorkar laipuite chu lo inpuahchah lawk a ngai a ni," a ti.

Rajnath Singh chuan India leh Myanmar ramri chu muanawm rih hle mah se, ven uluk a la ngai reng tih sawiin, "Ramrite hi ralthuam, ruihhlo, dan phal loh bungrua leh pawisa lem tawlhrukna atante hman ṭhin a ni. Hei bakah hian India rama rawn lut, thil tisualte'n inhumhimna atan Myanmar an pan ṭhin," a ti a, ramri dinhmun zir chiang tur hian Special Secretary (Internal Security) kaihhruaina hnuaiah committee din a nih tur thu a sawi.

Ramri hrula police station-te tihchangtlun a nih tur thu sawiin Union Home Minister chuan, "Infrastructure ṭha leh a ṭul leh mamawh ang zat police dah a ni ang," a ti.

Ramri sawihonaah hian Union Minister of State for Home Kiren Rijiju, Mizoram chief minister Lal Thanhawla, Home minister R Lalzirliana; Manipur chief minister N Biren Singh; Arunachal Pradesh chief minister Pema Khandu, dy. chief minister Chowna Mein; Nagaland Home minister Y Patton bakah heng state pali leh sorkar laipuia official eng emawzat an tel.

Union Minister-te hi nizan khan Raj Bhavan-ah an riak a, ruahmanna an siam dan chuan vawiin hian Parva khua, Lawngtlai district emaw Zokhawthara India leh Myanmar ramri helicopter hmangin a tlawh ang a, he mi hnu hian Mizoram a chhuah dawn a ni.