Kawṭhalo do beihpui thlak ṭan

Kumina kawṭhalo do beihpui thlakna, Intensified Diarrhoea Control Fortnight (IDCF) 2017 chu nimin khan ṭan a ni a, Health minister Lal Thanzara'n Aizawl Civil Hospital-a Paediatric OPD-ah a hawng. IDCF Fortnight hi district dangah pawh hman ṭan a ni.

Health Minister chuan, kawṭhalo chu natna tlángláwn leh huatthlala tak, hotêa lang ni mah se, enkawl ṭhat loh chuan thihna thlen thei a nih avangin ngaihthah chi a nih loh thu a sawi a, "Sorkar damdawi-in, Health sub-centre leh anganwadi centre-ahte ORS Zinc corner siam a ni a, hengahte hian kaw-ṭhalo leh kawṭhaloin a thlen taksa tui tlakchhamnate enkawl theih an ni dawn," a ti.

Lal Thanzara chuan, kawṭhalo do beihpui thlak a nih chhungin accredited social health activist (ASHA)-te'n an huam chhunga naupang kum nga hnuai lamte an tlawh chhuak ang a, ORS-te semin, kawṭhalo ven dan leh enkawl dan tur te, ORS siam dante an zirtir dawn tih a sawi.

Kawthalo enkawlna ṭha ber chu ORS leh Zinc a nih thu sawiin Lal Thanzara chuan, kawṭhalo laka fimhlim turin faina ngai pawimawh tur leh mahni in leh a velte vawngfai tur te, hmun kilkhâwr zawk leh ek-inte vawng fai tur te, tui thianghlim chauh in tur leh, thil ei dawnah fai taka kut sil ṭhin turin mipui a chah.

National Health Mission-a director Dr Lalrozama chuan, naupang kawṭhalo chu rálpui beih anga do tham a nih thu a sawi. Aizawl Civil Hospital-a Paediatric HoD Dr Lalchhuankimi'n 'Diarrhoea and its management and prevention’ tih thu a sawi a, kut silfai dan turte a takin kalkhawmte a zirtir.

Chhiahtlang Middle School-ah pawh Serchhip district tana IDCF Fortnight hawnna hun hman a ni a; Serchhip chief medical officer Dr Laldawngliana Sailo-in a hmanpui.

Serchhip CMO chuan, kawṭhalote tan a tam thei ang ber ORS in ṭhin tur a nih thu sawiin, "ORS hi Health sub-centre leh anganwadi centre tinah dah a ni a, ASHA-te'n in tinah naupang kum 5 hnuai lamte hnenah an sem dawn bawk," a ti.

IDCF Fortnight hi India ram pumah kum 2014 aṭangin hman a ni a; a tum ber chu kawṭhalo vanga naupang thihna tihbo a ni. Sorkar thuchhuah tarlan danin, India ramah kum tin naupang kum 5 hnuai lam thite zinga 10% vel chu kawṭhalo vanga thi an ni.