Guwahati-a Mizo pahnih thih thuah Joint NGO-in Assam hotute an kâwm

NGO Coordination Committee (Joint NGO) hruaitute chuan, Guwahati-a Mizo zirlai pahnih thia chhar chungchangah kar kal ta khan Assam sorkara hotute leh tualthihna chhuitute an kâwm a, memorandum an thehlut.

Joint NGO chairman Lalbiakzuala, Central YMA president hnen aṭanga thu dawn danin, Joint NGO hruaitute hian Guwahati Downtown University-a zialai Lung­lei Electric Veng tlangval pahnih tualthih chungchangah hian June 9, 2017 khan Assam chief minister Sarbananda Sonawal, Railways SP leh tualthihna chhui tura din, Enquiry Commission Chairman-te an hmu a; memorandum an thehlut vek a ni.

Joint NGO hruaitute hian Assam Chief Minister chu Mizo tlangval pahnih thihnaa inhnamhnawihte chhui chhuah an nih ngei theih nana chak taka hma la turin an ngen a; CM Sarbananda Sonowal chuan tualthihnaa inhnamhnawihte chhui chhuah an nih a, thu dik hai lan a nih theih nan theihtawp chhuah a tum thu a lo hrilh. Assam CM hi an Chief Secretary-in a ṭawiawm a ni.

Enquiry Commission Chairman an hmuhnaah NGO hruaitute chuan thil awm dan, a hmuna an hmuh dan leh an rin dante an hrilh a; Enquiry Commission Chairman chuan, tualthihna chungchanga hriat leh sawi duh nei apiangte'n a hnena an sawi theih nan chanchinbuah hriattirna a chhuah tur thu a lo hrilh.

Downtown University-a Mizo zirlaite leh hotute pawh an kâwm a; Downtown University hotute hnenah hian thil pathum - university-a zirlai pahnih thihna vangin university-in râlna sum pe tur te, tualthihna an dem thu leh a chhan chhui chhuak thuai tura phûtna press release chhuah tur te, university-a Mizo zirlai 300 rual la awmte himna ngaihtuah turtein an ngen. An ngenna hi Downtown University hotute chuan an bawhzui nghal tur thu an sawi.

NGO Coordination Committee aiawhte hi Central YMA, MZP, MSU leh North East Students Organisation hruaitute an ni a; Mizoramah an rawn let leh tawh a ni.