KHAWTHLIR

Thisen pe
Selesih Branch YMA chuan YMA Day pualin nimin khan an khaw community hall-ah blood donation camp an huaihawt a, Synod Hospital tan thisen unit 16 an pe.

Geo tagging zirho
Agriculture directorate pahnih Research & Extension leh Crop Husbandry chuan, nimin khan Agriculture conference hall-ah Geo Tagging chungchang zirhona an buatsaih. Agriculture (RE) deputy director Vanlalthlamuana'n Agriculture hnuaia hmalak tawh dan leh hmalak lehna turte sawifiahin, kut hnathawktute hman ṭangkai turin in sak te, leilet siampui te, lei dawh leh thil dangte siam a nih ṭhin dan a sawi.

Lawmthu sawi
Kolasib Joint Action Committee chuan thuchhuah siamin, Kolasib aṭanga Dr Zothansanga Zadeng sawn chhuahna thupek sût an phût vanga NH-54 kawngpui an dannaa thawk chhuan mipui te, sûlsutu pawl hrang hrangte leh duty-te ei leh in atana sum leh pai thawhtu mimal leh pawl zawng zawng chungah an lawm hle tak zet tih an tarlang. Kawngpui dan vanga lirthei tangkhang enkawltute leh khualzinte ei tur lo petu - Kolasib Venglai Branch YMA, Kolasib Corps SAY, Thingdawl Venglai Branch KṬP leh mimala lo puitute zawng zawng chungah lawmthu an sawi bawk.

Harsatna awm zui lo
Lawngtlai District Land Owners Association-in Kaladan Multi Modal Transit Transport Project kawngpui siamnaa sorkarin an ram a laksakah zangnadawmna pek har vanga June 7, 2017-a Lawngtlaia PWD pisa (Multi Modal Project Division-I) an kalhsak hnuah harsatna a awm zui loa thu dawn a ni. Ram neitu mi 303-te zangnadawmna sum tur chu tihfel ngai a la awm nual avangin tunah chuan pek theih a la ni rih lo niin an sawi.