Doctor insawn tur dan chin Doctor pawl pahnihin pawi an ti

Indian Medical Association (IMA), Mizoram State Branch hruaitute leh Mizoram Government Doctors' Association (MGDA) hruaitute chuan, doctor sawn kual a nih vanga doctor mal dan beh awm ṭhin chuan doctor-te rilru a hliam an hlauh thu leh, nawrhna vanga health system chu fel chia an ngaih loh thu an sawi a; doctor insawn tur dan chin chu pawi ann ti.

Doctor insawn tur dan chungchangah hian IMA Mizoram president Dr Vanlalruata leh honorary secretary Dr John Zohming-thanga te biak an ni a; IMA hruaitute chuan, "Doctor posting hi sorkar thu a nih avangin IMA a inrawlh ngai lo a, kan member-te hi sorkar thu awih tur te, hmun pilril zawkah mipui rawngbawl tura kal turin kan infuih zawk ṭhin," an ti.

IMA hruaitute chuan, doctor ṭha duh vanga hmun ṭhenkhata khawtlang leh ram tibuai zawnga thil thleng a awm palh ṭhin chu pawi an tih thu an sawi a; an member-te a tuartu an ni ṭhin chu a luhaithlak a, IMA member dangte rilru a ná a, doctor-te a tiṭi ṭhin tih an sawi.

IMA hruaitute chuan, doctor specialist indaih lohna a nasat thu leh a zir chhuakte pawh chhan hrang hrang vangin sorkarin hna nghet a pe mai thei lo tih an hriat chian thu an sawi a, "Nawrna leh nawrhna vanga health system hi tihṭhat chi niin a lang lo. Mipuite nen ṭanrual a, inhrethiam tawn a, thawhhona boruak ṭha siam zel turin sorkar leh mipuite kan ngen a ni," an ti.

MGDA president Dr C Lalhrekima chuan, tlawmngai pawlte'n doctor mal dan beh aiin, an khua leh district-a awm tur post siam belh tura ṭan an lak a pawimawh zawk tih a sawi a, "Doctor hminghmerha indan leh duh bik nei ang zawnga kan tih fo chuan doctor-te pawhin awm ngaihna kan hre lo mai ang. Mimal thil leh chhungkaw thilte pawh kan nei ve tihte hi min hriatsak ve se a ṭha," a ti a; insawn tur dan ang chi chuan doctor-te a tichêp ṭhin tih a sawi.

Sorkarin Mizoram pum ngaihtuahin a ṭha thei ang ber turin ro a rel a, ruahmanna a siam zel tura an ngaih thu sawiin Dr C Lalhrekima chuan, "Khaw tin leh district tin hian sorkar kan dawr danah awmze nei thui zawk kan thlir fo a pawimawh. Naupang specialist, hmeichhe specialist, surgeon kan duh, min pek hma chu... order an sût hma chu... tih ai chuan, kan district-a mi tur chu mi post chu siam ni rawh se' tihte hi a tlo zawk ang," a ti.

Dr C Lalhrekima chuan, mipui mamawhna hre rengin sorkarin a dahna apiangah mipui tana ṭha thei ang bera thawk turin an member-te an ngen ṭhin thu a sawi a; MGDA-in mipui tana ṭha tur sorkarah an thlen fo a, doctor post ruak apiang kum tina hnawhkhat tura an ngen thu leh tuna sorkar chuan a ngai pawimawha a hriat thu a sawi bawk.

MGDA President sawi danin, sorkarin kum 2006 hnuah doctor a ngheta thawk tur a lak loh reng hnuah, kum 2013-ah mi ṭhahnem tak a la a, chumi hnuah chuan a khát tawkin a la zeuh zeuh a ni. PHC tinah doctor pahnih zel leh district hospital-ah specialist mamawh zual awm theih nan post siam belh an duh a ni.

Kolasib mipuiin sawn chhuah an phal loh vanga an dan, Dr Zothansanga Zadeng chuan sorkarin insawn tura a tih laia dan beh a nih chungchangah hrehawm a tih thu Vanglaini palai zawhna chhangin a sawi a; Health department-in transfer and posting-ah norms a neih loh avangin doctor-te awm dan rei zawng sawi theih a ni lo a, mipuiin an ui vanga dan beha an awm chu nuam lo a tih thu sawiin, "Nakin zelah an intihhmuh zel ang tih a hlauhawm a, tunah pawh mi ṭhenkhat chuan Kolasib MZP-te hnenah ka kal duh loh vanga pawisa ka pekte ringin an lo zawt hial a, a hrehawm hle a ni," a ti,

Dr Zothansanga chuan, Kolasib mipuiin nawrh an huaihawt lai pawhin damlo an zai reng thu te, Bûkvannei leh Bilkhawthlir aṭangin damlo zai ngaite chu an hnena an thawn thu leh inzai tênau nen phei chuan mi 10 vel an zai hman thu a sawi.

Hetih lai hian, sorkarin Serchhipa awm tura a tih tâk Dr Zochampuia chuan, Ser­chhipa awm chu a huphurh lo tih sawiin, "Kan lungawi lo a nih chuan kan báng mai tur a ni. Mahse, hotute'n an tihnaah chuan kal ngei a ngai a ni mai. Mi hlim thei tak ka nih avangin Serchhipa awm hi ka huphurh lo," a ti.

A tirah contract an ziah laiin Health department hotute khawngaihna vangin Kolasib a thlang tih sawiin Dr Zochampuia chuan, "Duhthlan tur awm lo pawh ni se, thiamthu sawi thei kan ni lo. Kum khat atan contract kan sign a, Serchhipah pawh contract kan sign leh mai dawn a, rilru hrehawmna ka nei lem lo," a ti a; State Vector Borne Diseases Control programme-ah consultant-in a awm tawh ṭhin a, hrang hranga a kal kual nasat tawh avangin insawn a hreh lo tih a sawi.