Innei 20,434 sorkarah inziak lut tawh
Nupa tuak tharte sorkara an inziah luhna tur dan, The Mizoram Compulsary Registration Marriages Act, 2007 hman a nih hnuah nikum March thla tawp thleng khan sorkarah mi 20,434 an inziak lut tawh.
Law & Judicial department-a Registrar General of Marriages hotute sawi danin, The Mizoram Compulsary Registration Marriages Act hi kum 2008 aṭangin hman a ni.
March 2016 thlenga innei thar sorkara inziak lut zingah Kristian dana innei an tam ber a, mi 19,678 an awm. Hindu dana innei mi 95, Muslim dana innei pakhat, Buddhist dana innei 658 leh sakhaw dang dana innei pahnih an awm bawk.
Nupa tuak thar, sorkara inziah luh hun pangngai chhunga inziak lut lote late fee chawi tling khawm Rs. 1,84,650 chu Registrar General of Marriages chuan sorkarah an chhung lut tawh a ni.
The Mizoram Compulsary Registration Marriages Act hnuaiah hian inneih aṭanga thla khat ral hmain sorkarah inziah luh tur a ni a, thla khat a ral hnuah chuan late fee Rs. 100 chawi a ngai a, a hnuah zelah chuan thla tin Rs. 50 zelin a pung a; late fee hi Rs. 1,000 thleng chawi theih a ni.
Registrar General of Marriages hotute chuan, innei tharte sorkara inziah luh chu khawpuiah miin an ngai pawimawh viau a, thingtlang lam mite erawh chuan an ngai pawimawh lo deuh niin an sawi.