Pathianin kan hma lam atan min buatsaih a tum - Duhoma

ZNP president Lalduhoma chuan nimin khan an party inkhawmah thu sawiin, "Tun thlenga ZNP-in hma lam pana kan kal ve zel hi Pathianin kan hma lam atan min buatsaih a tum a ni ang tih ka ring tlat a ni," a ti.

Lalduhoma chuan, "Mizoram political history en let chuan, ral tawh tura ngaih, keh fo pawh an ding chhuak leh mai. Chutih laiin, party ngêlngheta ngaih pawh hniam takah mipuite’n kan dah leh mai ṭhin. Political party zawng zawngin harsatna namênlo an lo tawk tawh vek a, ZNP aia harsatna tâwk nasa vek an ni,” a ti a; ṭualto party ZNP chu hma lama a kal zel avangin Pathianin Mizoram hma lam hun atan buatsaih a tum nia a hriat thu a sawi.

Political party hrang hrangte chu phel tawh ṭhin a, an inhnawtchhuak a, MLA-te an inrûksak tawn tawh ṭhin nia sawiin Duhoma chuan, "Mizoram political party zingah ZNP chiah hi la keh ve lo awm chhun a ni a, member-te kan policy-ah chhum hmin kan nih vang a ni," a ti.

ZNP President chuan an party-a mi tinte chu kum 2018 inthlanpui hmain mi pakhat ṭheuh ZNP-a la lut turin a chah a, "Mi pakhat ṭheuh kan lak luh chuan member nuai hnih vel kan ni dawn," a ti a; inthlan hnuhnung bera vote tlak dan enin, inthlan lehah anmahni khing zo tur party dang an awm dawn lo niin a sawi.